Heydər Əliyev adına Tiflis Dövlət Peşəkar Azərbaycan Dram Teatrının yaradıcı kollektivi tanınmış türk yazıçısı Əziz Nesinin “Öldür məni, əzizim!” əsərini səhnələşdirib.
Paytaxt Tbilisidəki Azərbaycan teatrı görkəmli aktyorumuzun nəticələrinin iştirakı ilə yeni tamaşa təqdim edib. Mədəniyyət ocağı Kote Marcanaşvili adına Dövlət Dram Teatrının kiçik səhnəsində görkəmli türk yazıçı və dramaturqu Əziz Nesinin “Öldür məni, əzizim!” pyesi əsasında hazırlanan eyniadlı tamaşanın premyerasını keçirib. Quruluşçu rejissoru və musiqi tərtibatçısı Giorgi Apxazava olan səhnə əsərində rolları Aida Tağıyeva, Leyla Qasımova, Telman İsfahanlı və Fuad İsfahanlı ifa ediblər. Bədii rəhbər Turqay Vəlizadə nümayişdən sonra bizimlə müsahibəsində deyib ki, tamaşa çoxdan hazır olsa da, pandemiya səbəbindən premyerası bir qədər gecikib. Yeni mövsümdə isə daha iki premyera planlaşdırılıb. Turqay Vəlizadə onu da bildirib ki, tamaşadakı İsfahanlı qardaşları görkəmli azərbaycanlı aktyor və rejissor, Tbilisidəki Azərbaycan teatrının formalaşmasında müstəsna xidmətlər göstərmiş, Gürcüstan SSR Xalq artisti İbrahim İsfahanlının nəticələridir.
Qeyd edək ki, İbrahim İsfahanlı geniş tamaşaçı kütləsinə “Böyük dayaq” filmində Yarməmməd rolunun ifaçısı kimi yaxşı tanışdır.
Uzun fasilədən sonra, ilk tamaşasını səhnəyə qoyan Heydər Əliyev adına Tiflis Dövlət Peşəkar Azərbaycan Dram Teatrının bundan sonra bir çox rayonlara qastrol səfərləri də planlaşdırılır.
Şahismayıl Şəmmədoğlu