Azərbaycan Kinomatoqrafçılar İttifaqında 4 cildlik “Azərbaycan kino sənəti tarixi” kitabının təqdimat mərasimi keçirilib.
Azərbaycan Kinematoqrafçılar İttifaqının təqdimatında olan 4 cildlik “Azərbaycan kino sənəti tarixi” kitabı Azərbaycan Demokratik Respublikasının 100, Azərbaycan Kinosunun 120 illiyinə ithaf olunur. Kitabın müəllifi yazıçı-publisist Nəriman Əbdürrəhmanlı, layihənin rəhbəri isə Azərbaycan Kinematoqrafçılar İttifaqının sədri, Xalq yazıçısı Rüstəm İbrahimbəyovdur.
Təqdimat mərasimində qeyd olundu ki, kitabda kinofilm istehsalı ilə yanaşı, kinotexnikanın, kinoprokatın, kinolaşdırmanın, eləcə də ekran sənətinin bütün sahələrinin inkişafı izlənilib, Azərbaycan kinosunda xüsusi rolu olan sənət adamlarının tutumlu portretləri yaradılıb.
Kitabın müəllifi Nəriman Əbdürrəhmanlı kitab haqqında öz təəssüratlarını bölüşdü: “Ittifaqin sədri, görkəmli sənətkarımız Rüstəm İbrahimbəyovun rəhbərliyi altında Azərbaycan kinosunun və Azərbaycan kino xadimlərinin təbliği ilə bağlı nəşrlər seriyası başlamışıq... Mən elə bilirıəm ki, Azərbaycan kino tarixində ilk fundamental bir işdir. Həm kinomuzla bağlı faktları itib-batmağa qoymadıq. Araşdırmaçıılar, tələbələr, Azərbaycan kinosu ilə maraqlanan bütün insanlar üçün bu nəşrin yararlı olacağını düşünürəm”.
Qeyd edildi ki, kitabda, həmçinin 120 illik kino tariximizə dair ilk dəfə üzə çıxarılan sənədlərlə yanaşı, nadir fotoşəkillər də öz əksini tapıb.
Azərbaycan Kinematoqrafçılar İttifaqının katıbı Əli İsa Cabbarov bunları söylədi: “Əsas problemlərdən biri kimi kinomuzda hesab edirik ki, dərsliklər azdır. Kinoşünaslıq nəşrləri azdır. Bu boşluğu doldurmaq lazımdır. Ona görə də biz nəşr işini xətlərimizdən biri kimi, fəaliyyət istiqamətindən biri kimi götürmüşük. 120 ildə hadisələr haqqında zəngin material toplanılıb. Ona görə də dərslik əhəmiyyəti, elmi əhəmiyyəti şəksiz və mübahisəsizdir”.
Əli İsa Cabbarov Azərbaycan Kinematoqrafçılar İttifaqında yaxın gələcəkdə görüləcək layihələr haqqında da danışdı: “İl boyu biz bölgələrdə filmlərimizi nümayiş eləməliyik və əsas da məqsədimiz odur ki, kinoteatrlar olmayan bölgələrdə mütləq yeni Azərbaycan filmləri ilə tanış olmaq. Bundan başqa Kinematoqrafçılar İttifaqının birillik təhsil müddətini başa vurur... Bu il, yəni sentyabrda yeni heyət yığılacaq. Yenə də rejissura və ssenari kursları qəbulu olunacaq”.
Ülviyyə Heydərova