2021-ci il Azərbaycanda Nizami Gəncəvi, Türkiyədə isə Yunus Əmrə ili kimi qeyd olunur... Dünya ədəbiyyatının görkəmli nümayəndələrinin irsi bu il çərçivəsində daha geniş tədqiq olunaraq, təbliğ edləcək...
Bu il ölkəmizdə bəşəriyyətin bədii fikir salnaməsində yeni səhifə açmış görkəmli nümayəndə, dahi Azərbaycan şairi və mütəfəkkiri Nizami Gəncəvinin 880 illiyi qeyd olunur. Bu məqsədlə, il ərzində müxtəlif tədbirlərin həyata keçirilməsi planlaşdırılır. “Nizami Gəncəvi” ili çərçivəsində şairin həyat və yaradıcılığı daha geniş formada araşdırılaraq, sənətkarın zəngin irsinin təbliğ ediləcək. Qeyd edək ki, 1981 və 2011-ci illərdə də böyük sənətkarın yubileyləri ölkənin mədəni həyatının əlamətdar hadisəsinə çevrilmişdi. 2021-ci il Türkiyədə isə Yunus Əmrənin vəfatının 700-cü ildönümü münasibətilə “Yunus Əmrə və Türk dili ili” elan edilib. İldönümün qeyd edilməsi UNESCO-nun yubileylər proqramına da daxil edilib. Yaradıcılığı ümumbəşəri insani dəyərlər üzərində qurulmuş Yunus Əmrə dünya humanizminə töhfə vermiş şairlərdəndir. Onun əsərlərində istifadə olunan türkcənin əhəmiyyətinin vurğulanması və doğru istifadəsini təmin etmək üçün müxtəlif layihələrin keçirilməsinə qərar verilib.