Xüsusilə uşaqların maraqla izlədikləri cizgi filmlərinin bəzilərinə Disney yayım platforması yaş məhdudiyyəti tətbiq edib.
Uşaq və yeniyetmələr üçün animasiya filmləri yayımlayan “Disney” şirkəti 7 yaşınadək uşaqlara “Dambo”, “Piter Pan”, “Aristokrat pişiklər” və “İsveçrəli Robinzon ailəsi” cizgi filmlərinə baxmağa məhdudiyyət qoyub. Qərara səbəb kimi sözügedən ekran əsərlərində irqçiliyin nümayiş etdirilməsi göstərilib. “Piter Pan”ın “Redskins” adlanan hindu qəbiləsini təsvir etdiyi üçün bloklandığını ehtimal edilir. “Aristokrat pişiklər”ə gəldikdə isə, qəhrəmanlardan birinin obrazı vasitəsilə “Şərqi Asiya xalqlarının karikaturası”nın çəkildiyi güman edilir. “Dambo” filmində cənub plantasiyalarında afro-amerikalı işçilərə fərqli münasibət göstərildiyi bildirilib. Kadrlardan birində qaradərili personajlar mahnılarında “Qazancımızı alanda bütün pulları israf edirik” ifadəsini işlədiblər. “İsveçrəli Robinzon ailəsi” filmi isə pirat obrazına görə tənqid olunub.