Sevilən aktyor Tom Henks kino fəaliyyəti ərzində ilk dəfə vestern janrlı filmə çəkilib. “News of the World”, yəni “Dünyadan xəbərlər” adlanan yeni ekran işi tezliklə böyük ekranlarda nümayiş olunacaq.
Rejissoru Pol Qrinqrass olan “News of the World” bədii filmi vestern janrındadır. Yazıçı Polett Caylsın 2016-cı ildə işıq üzü görən eyniadlı romanı əsasında ekranlaşdırılan filmdə baş rolu Tom Henks ifa edir. Kinokaryerası ərzində ilk dəfə vestrn janrlı filmdə çəkilən aktyor at sürməyin və silahdan atəş açmağın həyacanını da yaşayıb.
Aktyor Tom Henks deyir ki: "Adətən film çəkilişlərində ilk 3 gün rola öyrəşə bilmirəm. Çəkiliş meydançasında ora-bura gəzərək gördüyüm işin əhəmiyyəti və rolu necə canlandıracağım haqqında düşünürəm. Burada əsas məsələ, işlədiyin kollektivin sənə inanması və filmin uğur qazanacağına əmin olmasıdır. Nə yaxşı ki, bu dəfə də peşəkar kollektiv mənim çətin xarakterimin öhdəsindən gəldi".
Filmdə vətəndaş müharibəsi veteranı Kapitan Ceferson Kidi canlandıran Tom Henks Amerika ərazisində şəhərbəşəhər gəzərək insanlara xəbər çatdırır. Səfərlərinin birində hindularının oğurladığı balaca qızıla tanış olur və onu xilas etmək qərarına gəlir. Uşağı aborigen Kiova tayfasının əlindən xilas edən kapitan Ceferson səyahəti boyu böyük təhlükələrlə üzləşir və evinə çatmaq üçün gərgin mübarizə aparır. İNTERŞUM...
Filmin rejissoru Pol Qrinqrass film haqqında bunları söyləyib: "Qəribəsi budur ki, filmin montajına başladığım ərəfədə COVID-19 virusu da vüsət aldı. Günbəgün daha geniş yayılan virus filmdəki süjetlə də uyğunluq təşkil edirdi. Çünki filmdə də əsas hekayə bir uşağın xəstəlik haqqında söhbəti ilə başlayır və qorxunc vəba epidemiyasının yayılması ilə bitir".
Filmdə XIX əsrdə Amerikanı bürüyən vəba epidemiyası fonunda cərəyan edən hadisələr bu gün bütün dünyanı bürüyən pandemiya ilə üst-üstə düşür. Bu isə ekran əsərini daha da aktuallaşdırır. “News of the World” filminin dekabrın 25-dən etibarən böyük ekranlarda nümayiş olunacağı nəzərdə tutulur.