“Şuşa evinə qayıdır”... Düşmən üzərində qələbəyə həsr olunan növbəti layihə belə adlanır. Xalq artistləri Zülfiyyə Xanbabayeva, Tünzalə Ağayeva, Əməkdar artist Abbas Bağırov və müğənni Xəyyam Nisanov rəşadətli ordumuzun düşmən üzərində qələbəsi, Azərbaycanın ərazi bütövlüyünün bərpa olunması münasibətilə “Şuşa evinə qayıdır” layihəsini təqdim ediblər.
İfaçılar layihənin həyata keçirilməsində köməyə görə Heydər Əliyev Fonduna və Heydər Əliyev Mərkəzinə minnətdarlıqlarını bildiriblər.
Xalq artisti Tünzalə Ağayeva layihə haqqında bunları dedi: “Təsir gücü olan, dərinliyi olan “Şuşa” mahnısını düşünürəm ki, bütün insanlar sevəcək. Bu mahnını özəlliklə rus dilində oxumağımız xüsusi məqsəd daşıyır. Rusdili auditoriyamız, istər Rusiyada yaşayan azərbaycanlılarımız üçün və ümumiyyətlə, rusdilli auditoriya üçün, MDB ölkələri üçün məhz rus dilində oxunan Şuşa haqqında mahnı yaxşı bir təbliğata xidmət edəcək”.
“Şuşa evinə qayıdır” mahnısının sözləri və musiqisi Seymur Aslanovdur. Balabanda Orxan Musayev, tarda Ələkbər Ələkbərov ifa ediblər. Klipin rejissoru Cəlal Kənqərlidir.
Ülviyyə Heydərova