Kinosevələrin səbrsizliklə gözlədiyi “Çətin tapşırıq” filminin çəkilişlərinə yenidən başlanılıb.
Hollivudun ən çox gəlir gətirən bədii seriallarından biri olan “Çətin tapşırığ”ın 2018-ci ildə ekranlara çıxan versiyası 791 milyon dollardan artıq büdcə yığmışdı. Buna görə də kino sənayesinin canlanması üçün film üzərində sürətli iş gedir. COVID-19 virusunun yenidən geniş miqyasda yayılmasını nəzərə alaraq, əsas qəhrəmanı canlandıran Tom Kruz sosial məsafənin qorunması və qaydalara ciddi riayət edilməsini bütün yaradıcı heyətdən tələb edib. Onun sözlərinə görə, bu cür həssas dövrdə işinin mahiyyətindən asılı olmayaraq, hər kəs məsuliyyət daşımalı, özünün və ətrafdakıların sağlamlığını düşünməlidir. Qeyd edək ki, əvvəlcə İtaliya və Norveçdə reallaşan çəkilişlər pandemiya səbəbilə dayandırılsa da dekabrdan başlayaraq, iş prosesi Londonda davam edir. “Çətin tapşırıq” filminin böyük ekranlara 2021-ci ilin noyabrında çıxacağı nəzərdə tutulub.