“Arşın mal alan” yenidən səhnədə - “Əsgər” obrazında ilk dəfə Ramil Qasımov

Müasir Azərbaycan peşəkar musiqi sənətinin və milli operasının banisi Üzeyir Hacıbəyovun “Arşın mal alan” operettası fevralın 16-da saat 19:00-da Akademik Opera və Balet Teatrında nümayiş olunacaq.

Əməkdar artist Ramil Qasımov operada ilk dəfə “Əsgər” obrazında çıxış edəcək.

R.Qasımov tamaşa ilə bağlı danışarkən qeyd edib ki, Üzeyir Hacıbəyovun əsərləri hər bir  ifaçının repertuarında ən önəmli yeri tutmalıdır: “Hər zaman üzərimə düşən rolu dərk edib, öhdəsindən məharətlə gəlib onu fərqli təqdim etməyə çalışıram. “O olmasın, bu olsun”da “Sərvər”, “Koroğlu”da “Koroğlu”nu, ifa  etmişəm. Çalışacağam ki, “Arşın mal alan”da “Əsgər” obrazını da fərqli yanaşma ilə ifa edim”.

Məlumat üçün bildirək ki, tamaşanın quruluşçu rejissoru Əməkdar incəsənət xadimi Hafiz Quliyev, dirijoru  Əməkdar artist  Əyyub Quliyevdir. Baş rolları Əməkdar artistlər - İnarə Babayeva, Cahangir  Qurbanov, Gülüstan Əliyeva, Ələkbər Əliyev, Tural Ağasiyev, Xalq artisti Gülyaz Məmmədova və solist Aysel İbrahimova ifa edir.