Dövlət Turizm Agentliyi, Şuşa Şəhəri Dövlət Qoruğu İdarəsi və Milli Kulinariya Mərkəzinin birgə təşkilatçılığı ilə Şuşa şəhərində Beynəlxalq Qastronomiya Günü keçirilib.
Tədbirin ikinci hissəsində açıq havada qurulan stendlərdə “İftar və onunla bağlı sosial-mədəni ənənələr” adlı UNESCO-nun Qeyri-maddi Mədəni İrsin Reprezentativ Siyahısına daxil edilmiş çoxmillətli nominasiyasına uyğun iftar süfrəsini əks etdirən yeməklərin dequstasiyası olub.
Mərasimdə Şuşa rayonunda Azərbaycan Respublikası Prezidentinin xüsusi nümayəndəsi Aydın Kərimov Şuşada İslam ölkələrinin ortaq süfrəsi tədbirinin keçirilməsinin qürurverici olduğunu bildirib.
"Bu tədbirin yüksək səviyyədə keçiriləcəyinə heç bir şübhəm yoxdur. Bu festivalda İslam ölkələrinin mədəniyyətini, mətbəxini və ləziz yeməklərini nümayiş etdirmək üçün hər cür şərait yaradılıb", - deyə A.Kərimov diqqətə çatdırıb.
Daha sonra Aydın Kərimov stendlərlə tanış olub.
Stendlərdə Azərbaycan, İran, Türkiyə və Özbəkistanın iftar süfrəsini əks etdirən yeməklər nümayiş olunub.
