Bakı Kulinariya Assosiasiyasının aşpazlar komandası avqustun 9-dan 11-dək Pakistanın Lahor şəhərində keçirilən 3-cü “Salonniere Mystery Box” beynəlxalq müsabiqəsində ölkəmizi uğurla təmsil edib. Müsabiqə 16-cı Pakistan Beynəlxalq Qida Sənayesi Sərgisi çərçivəsində təşkil olunub.
Assosiasiyadan bildirilib ki, çempionatda Azərbaycan milli yeməklərini müasir üslubda təqdim edən komandanın işlər böyük maraqla qarşılanıb.
Müsabiqədə aşpazlarımızdan komandanın kapitanı Sərxan İmanlı, komanda üzvləri Emin Əliyev, Elxan Mirzəyev və İlqar Əhmədov yer alıb. Çempionata dəvət olunmuş hakimlərdən biri də Bakı Kulinariya Assosiasiyasının prezidenti İlkin Əkbərzadə olub.
Qeyd edək ki, assosiasiyanın aşpazlar komandası bu il Ümumdünya Aşpazlar Birliyi (WACS) rəhbərinin dəstəyi ilə təşkil olunmuş “Karaçı Aşpazlar Assosiasiyası” tərəfindən qitə çempionatında qızıl medal qazanıb.
