Aşqabadda Azərbaycan xalqının Ümummilli Lideri Heydər Əliyevin 100 illik yubileyi münasibətilə “Heydər Əliyev – Azərbaycan və Türkmənistan qardaşlığı” adlı konsert keçirilib.

Konsertdən əvvəl iştirakçılar “Heydər Əliyev – Azərbaycan və Türkmənistan qardaşlığı” adlı fotosərgi ilə tanış olublar. Sərgidə Ulu Öndər Heydər Əliyevin həyat və fəaliyyətini, eləcə də Azərbaycan-Türkmənistan diplomatik münasibətlərini səciyyələndirən fotolar nümayiş etdirilib.

Konsertin əvvəlində çıxış edən Azərbaycanın Türkmənistandakı səfiri Qismət Gözəlov Ümummilli Lider Heydər Əliyevin ölkələrimizin əlaqələrinin inkişafına verdiyi töhfələrdən danışıb.

Konsertdə Azərbaycanın “Muğam” qrupu və Türkmənistanın Dövlət Simfonik Orkestrinin birgə müşayiətilə xalq və bəstəkar mahnıları ifa olunub.

Azərbaycan-Türkmənistan Birgə Hökumətlərarası Komissiyasının həmsədrləri - Azərbaycanın iqtisadiyyat naziri Mikayıl Cabbarov və Türkmənistanın Nazirlər Kabineti sədrinin müavini Batır Atdayev konserti izləyiblər.

Tədbirə, həmçinin Türkmənistan Hökumətinin rəsmi şəxsləri, xarici ölkələrin Türkmənistandakı səfirləri, diplomatik nümayəndəliklərin rəhbərləri, əməkdaşları, onların ailə üzvləri, eləcə də ictimaiyyət və media təmsilçiləri qatılıblar.