Oktyabrın 30-da Musiqi forumunda "Milli mədəni ənənələrin qlobal miqyasda təbliği" mövzusunda panel sessiya keçirilib.
Əməkdar incəsənət xadimi, musiqişünas Cahangir Səlimxanovun moderatorluğu ilə keçirilən iclasda İstanbul musiqi festivalının direktoru Efruz Çakırkaya, Rusiyanın Əməkdar artisti, Azərbaycan Dövlət Akademik Opera və Balet Teatrının baş baletmeysteri Ruslan Pronin, “K2İD Productions" şirkətinin rəhbəri, yunanıstanlı İlias Kokotos və “Real World Music Label"in təsisçi və bədii rəhbəri, danimarkalı Karolina Vallejo məruzələrlə çıxış ediblər.
Sessiyada akademik musiqinin təqdimatında yeni çağırışlar, müasir multikultural cəmiyyətlərdə etnik ənənələrin qorunması, bu günün musiqi ənənələri: hamar ötürülmə, yaxud kəskin dəyişiklik, musiqi sənayesinin dövriyyədə olan rəqəmsal vasitələrinin tətbiqində yaranan təmayüllər, qlobal mədəniyyət mübadiləsində Azərbaycan musiqisi və musiqiçilərinin iştirak perspektivləri: kənardan baxış kimi mövzular diqqət mərkəzinə gətirilib.
Efruz Çakırkaya klassik musiqi ənənəsi və tamaşaçının klassik musiqiyə marağının artırılması problemlərindən söz açıb, rəhbərlik etdiyi İstanbul musiqi festivalının tarixi və fəaliyyəti haqqında məlumat verib.
Baletmeyster Ruslan Pronin Azərbaycan xoreoqrafiya məktəbinin köklü ənənələrə malik olduğunu bildirib, bu sənətin beynəlxalq aləmdə təbliği istiqamətində ardıcıl addımlar atılmasının əhəmiyyətini vurğulayıb.
Almaniyadan musiqiçi və musiqi meneceri Nikolas Rexroth ölkəsində 240 peşəkar musiqi təsisatının olduğunu deyib, Berlində yeddi böyük simfonik orkestrin fəaliyyət göstərdiyini diqqətə çatdırıb. Bildirib ki, bu təsisatların əksəriyyəti dövlət tərəfindən maliyyələşir. O, pandemiyadan sonra mədəni layihələrin təbliğatı, klassik musiqiyə marağın artırılması istiqamətində marketinqin tətbiqi üsulları, dizayn, afişa təqdimatı, habelə konsertlər üçün uğurlu məkan seçimi kimi məsələlərə də toxunub.
Yunanıstanlı qonaq İ.Kokotos “Avroviziya” mahnı müsabiqəsi ilə məşhurlaşan təşkilatlarının fəaliyyətindən söz açıb. Deyib ki, “K2İD Productions" təşkilatı müsabiqə üçün iştirakçıları təşviq edir.
Böyük Britaniyadan Linda Riçardson musiqi təhsili sahəsindəki yeniliklərlə bağlı məruzə edib. Musiqi təhsilində innovasiyalar, bu sahəyə dəstək üçün maliyyə mənbələri və şagirdlərin təqaüdlə təmin edilmələri ilə bağlı məlumat verib. Təhsildə beynəlxalq təcrübə, yeni çağırışlar istiqamətində atılan addımların əhəmiyyəti vurğulanıb.
Sonda iştirakçıları maraqlandıran suallar ətrafında fikir mübadiləsi aparılıb.
Musiqi forumu oktyabrın 31-də iki panel iclasından sonra başa çatacaq.
