Türkiyədə azərbaycanlı pianoçu, sənətşünaslıq üzrə fəlsəfə doktoru, Ərzurum Atatürk Universiteti Gözəl sənətlər fakültəsinin professoru Həqiqət Məhərrəmovanın 75 illiyi münasibətilə kitab işıq üzü görüb.
“Pianoya adanmış bir ömür” kitabında Azərbaycan, Türkiyə, Rusiya, Moldova və digər ölkələrdən tanınmış elm və incəsənət xadimlərinin sənətkar haqqında məqalə və fikirləri yer alıb.
Kitab Atatürk Universitetinin rektoru professor Ömər Çomaklının “Ön söz”ü ilə açılır. Rektor pianoçunun zəngin elmi ilə klassik musiqi sahəsindəki bacarıqlarını universitetin müvafiq sahəsinin inkişafında mühüm rol oynadığını bildirir. Gözəl sənətlər fakültəsinin dekanı Mustafa Bulat isə H.Məhərrəmovanı müasir sənət elmini dolğun şəkildə, ləyaqətlə tədris edən müəllim kimi xarakterizə edir, pianoçunun tədrisə yeni ruh və baxış gətirdiyini vurğulayır.
Kitabda Azərbaycandan Xalq artistləri Fərhad Bədəlbəyli, Aqşin Əlizadə, Xəyyam Mirzəzadə, Azər Rzayev, Rauf Atakişiyev, professorlar Rəna Məmmədova, Aida Tağızadə və digər tanınmış incəsənət adamlarının ürək sözləri və məqalələri də verilib.
Nəşrdə musiqiçi xanımın qardaşı Xalq artisti Məbud Məhərrəmovun da fikirləri yer alıb.
Həqiqət Məhərrəmovanın yaradıcılığının müxtəlif illərini əks etdirən fotolar, konsert və layihələrinin afişaları kitabı daha da rəngarəng edib.
Qeyd edək ki, Həqiqət Ələsgər qızı Məhərrəmova 1948-ci il martın 8-də Şəkidə anadan olub. 1971-ci ildə Üzeyir Hacıbəyli adına Azərbaycan Dövlət Konservatoriyasını (indiki BMA) bitirib. 1972-1974-cü illərdə təhsilini Leninqrad (Sankt-Peterburq) Dövlət Konservatoriyasının aspiranturasında SSRİ Xalq artisti P.A.Serebryakovun sinfində davam etdirib. 1974-cü ildə təhsilini fərqlənmə diplomu ilə başa vuraraq Azərbaycan Dövlət Konservatoriyasının İxtisas fortepiano kafedrasında pedaqoji fəaliyyətə başlayıb. 1980-1994-cü illərdə burada Fortepiano fakültəsinin metodiki seksiyasına rəhbərlik edib. 1997-1998-ci illərdə Pakistanın Lahor şəhərində pianoçu-solist kimi fəaliyyət göstərib. 1999-cu ildən Ərzurum Atatürk Universitetində dərs deyir.
O, Türkiyədə Beynəlxalq Ərzurum piano günləri (2007, 2010), Milli fortepiano musiqisi festivalları, habelə Beynəlxalq Ərzurum klassik musiqi festivalının (2012) layihə müəllifi və münsiflər heyətinin üzvü olub.
