Abdulla Şaiqin mənzil-muzeyində II Qarabağ müharibəsi şəhidlərinin Anım Gününə həsr olunmuş “Vətən müharibəsi xatirələrdə” adlı tədbir keçirilib.

Muzeydən  bildirilib ki, Dövlət Himninin səsləndirilməsi ilə başlayan tədbirdə şəhidlərin xatirəsi bir dəqiqəlik sükutla yad edilib.

Muzeyin direktoru Ülkər Talıbzadəyə dedi ki, bu gün həm çox hüznlü, həm də fəxr ediləsi bir gündür. Hüznlü gündür ona görə ki, bu gün biz şəhidləri anırıq. Fəxr edirik, ona görə ki, şəhidlərin qanı yerdə qalmadı, torpaqlarımız düşmən tapdağından azad olundu.

Jurnalist Zərəngiz Dəmirçi Qayalı çıxışında öz şəhid bacısı Vəfa Dəmirçioğlu haqqında, onun qəhrəmanlıq şücaətlərindən danışaraq, bacısına həsr etdiyi şeiri səsləndirib.

Jurnalist Tamilla Məmmədzadə 44 günlük müharibə dövründə bir jurnalist olaraq düşmənlə apardıqları informasiya müharibəsindən, Qarabağ müharibəsi şəhidi haqqında yazdığı kitabdan söhbət açıb.

Tədbirin bədii hissəsində muzeyin nəzdində fəaliyyət göstərən “Vətən” yaradıcılıq dərnəyinin üzvləri Vətən şəhidlərinə, qəhrəmanlara həsr edilmiş şeirlər səsləndiriblər.

Sonda 44 günlük zəfər yoluna və şəhidlik zirvəsinə həsr edilmiş videoçarx nümayiş etdirilib.