Tanınmış Misir arxeoloqu Zaid Havass Britaniya muzeylərində olan artefaktların qaytarılması üçün UNESCO-ya müraciət ünvanlayıb.

Arxeoloq müxtəlif vaxtlarda Misirdən təxminən 2 min artefaktın oğurlandığını bildirib və hazırda Britaniyanın muzeylərində olan qədim abidələrin, xüsusən məşhur “Rozetta daşı” yazılı kitabəsinin qaytarılmasını tələb edib. O, bu qədim əşyaların Misirdən çıxarılmasını və bir çoxunun şəxsi kolleksiyaçılara satılmasını dünya mədəni irsinə qarşı cinayət adlandırıb.

Britaniya Muzeyinin qəyyumlar şurasının sədri Corc Osborn bu həftənin əvvəlində bildirib ki, qızıl zinət əşyaları və qiymətli daşlar da daxil olmaqla, oğurlanmış artefaktların qaytarılması üzrə səylər davam edir.

Misirli arxeoloq həm UNESCO-nu, həm də Misirin Turizm və Qədim Əsərlər Nazirliyini qiymətli eksponatların Britaniya Muzeyində saxlanmasının riskləri barədə xəbərdar edib və onların qanuni sahiblərinə qaytarılması üçün atılacaq addımları müzakirə etmək məqsədilə beynəlxalq konfrans təşkil etməyə çağırıb. Havass əlavə edib ki, Avropa ölkələri keçmiş müstəmləkələrindən apardıqları bütün artefaktları geri qaytarmalı və bunun üçün xüsusi kampaniya təşkil edilməlidir.

Arxeoloq 2022-ci ildə Britaniya Muzeyindəki “Rozetta daşı” və Parisdəki Luvr Muzeyindəki “Dendera Bürcü”nün də daxil olduğu iki məşhur qədim artefaktın Misirə qaytarılmasını tələb edən petisiyaya başladıb. O, 2005-ci ildə Misirin Qədim Əsərlər üzrə Ali Şurasının baş katibi vəzifəsində işlədiyi müddətdə beş əsas Misir artefaktının geri qaytarılması üçün hökumətlərarası komissiyaya lobbiçilik edib.