X Beynəlxalq İpəkyolu Film Festivalının final mərhələsində iştirak edəcək filmlərin adları açıqlanıb.

Festivalın rəsmi saytına istinadən festivala Azərbaycan, Türkiyə, Qırğızıstan, Qazaxıstan, İtaliya, Suriya, Hindistan, İraq, Yunanıstan, İran, Əfqanıstan və Pakistandan ümumilikdə 2678 film müraciəti edilib.

Müraciətlər dəyərləndirildikdən sonra festivalın final mərhələsində iştirak hüququ qazanan filmlərin adı müəyyən olub.

Final mərhələsində iştirak edəcək filmlər arasında azərbaycanlı rejissorların da ekran əsərləri var. Pərviz Həsənov "Uşaqlıq fotosu" sənədli filmi, Elşad Elsevər isə "Açar" qısametrajlı bədii filmləri ilə festivalın finalında əsas mükafat uğrunda yarışacaqlar.

Azərbaycan Televiziyasının bədii və sənədli filmlər studiyasında istehsal olunan “Uşaqlıq fotosu” sənədli filmi doğma torpağından, el-obasından didərgin düşən bir ailənin, uşaqlığı işğalda qalan, bir dənə də olsun uşaqlıq şəkli olmayan qəhrəmanın sonrakı həyat hekayəsindən bəhs edir.

Hamkarımıza festivalın növbəti mərhələsində - finalda uğurlar arzulayır, festivalın gedişatı ilə oxucularımızı və tamaşaçılarımızı məlumatlandıracağıq.

Xatırladaq ki, ötən il IX Beynəlxalq İpəkyolu Film Festivalında Mədəniyyət Nazirliyinin sifarişi ilə “Azərbaycanfilm” kinostudiyasında istehsal olunan, rejissor Amil Amalın çəkdiyi “Titrəmə" qısametrajlı filmi festivalın finalına seçilərək “Ən yaxşı qısametrajlı film” mükafatına layiq görülmüşdür.