Fikrət Əmirovun 100 illiyinə həsr olunmuş növbəti konsert

17 Noyabr, 14:39 Sosial mediada paylaşın:

Üzeyir Hacıbəyli adına Bakı Musiqi Akademiyasının (BMA) nəzdində fəaliyyət göstərən Opera studiyasında görkəmli bəstəkar Fikrət Əmirovun 100 illiyinə həsr olunmuş konsert təşkil olunub.

Əvvəlcə bəstəkarın həyat və yaradıcılığını əks etdirən videoçarx nümayiş olunub.

Görkəmli bəstəkarın 100 illiyinə həsr olunan konsertin bədii rəhbəri Üzeyir Hacıbəyli adına Bakı Musiqi Akademiyasının professoru, Əməkdar müəllim Gülnarə Acalova, quruluşçu rejissoru isə BMA-nın müəllimi Dimitri Babayevdir.

Tədbirdə Əməkdar artist Nərgiz Kərimova və istedadlı gənc musiqiçilərin müşayiətilə BMA-nın “Sabah qrupu”nun xor kollektivi (bədii rəhbər və dirijor Dmitri Babayev) əsrarəngiz ifalarla çıxış ediblər.

Zəngin proqrama malik konsert gecəsində Fikrət Əmirovun "Min bir gecə" baletindən "İntroduksiya", "Azərbaycan elləri", "Laylay", "Qış yolu", "Gecə keçdi", "Ulduz romansı", "Ekspromt", "Gülüm romansı", "Gözün aydın" musiqili komediyasından Leylinin ariyası, "Sevil" operasından Balaşın mahnısı, "Kor ərəbin mahnısı", "Lirik pyes", , "Mən səni araram" və "Evləri var xana-xana" əsərləri ifa olunub.

Qeyd edək ki, gecədə ifa olunan hər musiqi əsərinə uyğun maraqlı səhnələrdən ibarət videoinstalyasiya tamaşaçılara təqdim edilib.

Sonda Fikrət Əmirovun qızı Sevil Əmirova belə möhtəşəm konsertin təşkil olunmasında əməyi keçən hər kəsə dərin təşəkkürünü bildirib.

CANLI YAYIM