Musiqi Mədəniyyəti Dövlət Muzeyində Firəngiz Əlizadə ilə yaradıcılıq görüşü keçirilib

30 Sentyabr, 12:39 Sosial mediada paylaşın:

Azərbaycan Musiqi Mədəniyyəti Dövlət Muzeyində Azərbaycan Bəstəkarlar İttifaqının sədri, Xalq artisti, professor UNESCO-nun Sülh artisti Firəngiz Əlizadə ilə yaradıcılıq görüşü keçirilib.

Muzeyin direktoru, Əməkdar mədəniyyət işçisi Alla Bayramova çıxış edərək bəstəkarın musiqi mədəniyyətimizin inkişafındakı xidmətlərindən danışıb.

Bildirilib ki, daim yaradıcılıq axtarışında olan Firəngiz Əlizadə bu gün də ənənəsinə sadiqdir. O, Azərbaycanı, doğma Vətənini böyük məhəbbətlə sevir və ona şərəflə xidmət edir. Onun əsərlərinin sədası bundan sonra da dünyanın ən məşhur konsert salonlarından gələcək.

Diqqətə çatdırılıb ki, Firəngiz xanımın hər bir uğuru Azərbaycan musiqisinin geniş miqyasda nüfuzunun artması kimi çox mühüm bir işə xidmət edir. Bəstəkarın yaradıcılığı musiqişünaslar üçün əsl tədqiqat mənbəyidir. Onun yaradıcılığına dair bir sıra elmi-tədqiqat işləri yazılmış, eləcə də onun əsərləri dissertasiya səviyyəsində araşdırılıb. Firəngiz xanımın yaradıcılığı yalnız ifaçılarımız üçün deyil, musiqi elmimiz üçün də dəyərli bir mənbədir.

Tədbirdə ZEYNJ studiyasının istehsalı olan “Firəngiz Əlizadənin yaradıcılıq səhifələri” sənədli filminin təqdimatı da keçirilib.

Filmin nümayişindən sonra mədəniyyət nazirinin birinci müavini Elnur Əliyev, Milli Məclisin deputatı Aydın Mirzəzadə, Xalq artisti, tarzən Ramiz Quliyev, Bakı Musiqi Akademiyasının prorektoru, Əməkdar incəsənət xadimi Gülnaz Abdullazadə çıxış edərək film haqqında təəssüratlarını bölüşüb, Firəngiz Əlizadənin Azərbaycan musiqi mədəniyyətinin inkişafında və təbliğində müstəsna xidmətlərindən danışıblar.

Azərbaycan Respublikasının Əməkdar artisti Rəna Rzayeva Firəngiz Əlizadənin “Music for Piano” əsərini ifa edib.

Sonda Firəngiz Əlizadə gələcək yaradıcılıq planlarından danışıb.

CANLI YAYIM