Məşhur mesenat Hacı Zeynalabdin Tağıyevin Fransada yaşayan qohumu Alban Klod Azərbaycanda səfərdədir. Alban Klod ilk olaraq babasının məzarını ziyarət edib, KİV nümayəndələri ilə görüşərək onların suallarını cavablandırıb.

Noyabrın 1-də AMEA-nın Milli Azərbaycan Tarixi Muzeyində görkəmli xeyriyyəçi Hacı Zeynalabdin Tağıyevin ikinci oğlu Sadıqın kötücəsi, ixtisasca tarixçi olan Alban Klod ilə görüş keçirilib. Görüşdə muzeyin əməkdaşları ilə yanaşı, Hacı Zeynalabdin Tağıyevin Bakıda yaşayan qohumları, ictimaiyyət nümayəndələri iştirak ediblər.

Qonaqları salamlayan muzeyin direktoru, akademik Nailə Vəlixanlı rəhbərlik etdiyi müəssisənin yaranma tarixi və fəaliyyətindən danışıb. Qeyd edib ki, muzeyin fəaliyyət istiqamətlərindən biri də Hacı Zeynalabdin Tağıyevin xalqımız üçün gördüyü işləri, onun həyat yolunu araşdırmaqdır. Hacı Zeynalabdin Tağıyevin fəaliyyətinin öyrənilməsi Azərbaycan tarixinin öyrənilməsi deməkdir. Çünki Azərbaycan tarixinin böyük bir hissəsi bu görkəmli xeyriyyəçinin fəaliyyəti ilə bağlıdır.

Akademik ölkəmizə ilk dəfə gələn Alban Klodun görüşdən xoş təəssüratla ayrılacağını və gündən-günə inkişaf edən Azərbaycanı doğulduğu Parisdə təbliğ edəcəyinə əminliyini bildirib.

Babasının evində olmaqdan məmnunluğunu ifadə edən Alban Klod görüşə görə muzeyin rəhbərliyinə minnətdarlığını bildirib.

Alban Klod nənəsi Zərrintac xanımın Parisdə çətinliklərlə dolu mühacir həyatından söhbət açıb. Bildirib ki, babası Sadıq onlara Hacı Zeynalabdin Tağıyev və Azərbaycan haqqında heç bir məlumat verməsə də, ölümündən sonra onun otağından qutular tapıb və Bakı haqqında məlumatlar əldə edib. “Bundan sonra məndə Tağıyev və Bakı haqqında araşdırma aparmağa motivasiya yarandı”, - deyə Alban Klod bildirib.