Bakı Şəhər Mədəniyyət Baş İdarəsinin Nəriman Nərimanovun xatirə muzeyində 18 may - Beynəlxalq Muzeylər Günü münasibətilə “Heydər Əliyev və muzeylərimiz” adlı tədbir keçirilib.

Baş İdarədən bildirilib ki, tədbiri muzeyin direktoru Ləman Hüseynova açaraq iştirakçıları qarşıdan gələn Beynəlxalq Muzeylər Günü münasibətilə təbrik edib.

Sonra “Heydər Əliyev və Azərbaycan mədəniyyəti” adlı videoçarx nümayiş olunub.

Tədbirdə çıxış edən Xalq şairi Nəriman Həsənzadə Heydər Əliyevin ziyalılara, sənət adamlarına göstərdiyi diqqət və qayğıdan söhbət açıb.

Daha sonra professor Fuad Məmmədov Heydər Əliyevin Azərbaycan mədəniyyətinə verdiyi töhfələrdən, quruculuq işlərindən danışıb.

Baş İdarənin rəisi İbrahim Əliyev çıxış edərək bildirib ki, görkəmli şəxsiyyətlərimizin adının əbədiləşdirilməsi ilə bağlı xatirə, ev-muzeylərinin yaradılması Heydər Əliyevin xalqımızın say-seçmə övladlarına verdiyi yüksək qiymətin nəticəsidir, muzeylər bizim tarixi yaşadan bir məkandır, muzeyləri qorumaq, inkişaf etdirmək bizim borcumuzdur.

Bülbül adına Orta İxtisas Musiqi Məktəbinin şagirdləri tərəfindən “Bayatı-Şiraz” muğamı və “Qarabağ şikəstəsi” ifa edilib.

Tədbir Azərbaycan Dövlət Akademik Filarmoniyasının aparıcısı Səmray Əliyevanın ifasında Nəriman Həsənzadənin “Azərbaycan” şeirinin səslənməsi ilə yekunlaşıb.