Azərbaycanın teatr və kino sənətinin inkişafında müstəsna xidmətləri olan Rza Təhmasibin genişmiqyaslı rejissorluq və aktyorluq fəaliyyəti sənət tariximizin parlaq səhifələrini təşkil edir.

Rza Təhmasib Naxçıvanda sayılıb seçilən tacir Abbasqulu bəyin ailəsində dünyaya gəlib. O, atasının istəyi ilə Tiflisdə ticarət məktəbinə qəbul olunsa da, Əsgər bəy kimi ticarəti yox, incəsənəti seçir. Çünki onun qismətində məşhur tacir Əsgər bəyin həyatından bəhs edən “Arşın mal alan” filmini çəkmək vardı. Rejissor Nikolay Leşşenko ilə birlikdə ekrana gətirdiyi bu film dahi Üzeyir Hacıbəyli sənətini zirvəyə qaldırmaqla yanaşı, II Dünya müharibəsindən yorulmuş insanların da qəlbini sevinclə doldurdu.

Rza Təhmasibin ömür yolu amansız Birinci və İkinci Dünya müharibələrindən, üstəlik dözülməz repressiyya dövründən keçib. Amma o, sənəti vasitəsilə Nikolay Qoqolun “Ölü canları”nı, Mirzə Cəlilin “Ölülər”ini teatrda dirildib. "İlk uğurlu rejissor işim üçün "Ölülər" pyesinə minnətdaram.”- deyən Rza Təhmasib istər doğma yurdu Naxçıvanda, istərsə də, Bakıda səhnəyə qoyduğu əsərləri ilə teatr sənətimizn inkişafına təkan verdi.

Rejissor kinoya da bağlı idi. O, 1927-ci ildə “Balıqçılar” filminə quruluş verib, "Səbuhi", "Mahnı belə yaranır", “Bakının işıqları" filmlərini çəkən rejissorlardan biri olub. Rza Təhmasib qardaşı Məhəməmdhüseyn Təhmasiblə birgə çəkdiyi “Onu bağışlamaq olarmı?” filmi milli kinomuzun işığını sönməyə qoymadı.

Rza Təhmasib özü də filmlərə həvəslə çəkilib. O, “Almaz”, “Bakıda küləklər əsir”, “Fətəli xan” və digər ekran əsərlərində obrazlar canlandırıb. Amma onun “Qanun naminə“ filmində yaratdığı Qaloşlu adam obrazı “məkrli qəhrəman necə olmalı və necə oynanılmalı?” suallarına sanki bir cavabdır...

Ülviyyə Heydərova