“Şuşam mənim...” Azərbaycan televiziyasının “Şuşa İli” ilə bağlı yeni layihəsi belə adlanır.

Azərbaycan Televiziyası “Şuşa ili” ilə bağlı mədəniyyət paytaxtı haqqında silsilə verilişlər təqdim etməyə hazırlaşır. “Şüşam mənim” layihəsi də onlardan biridir. Şuşanın tarixi, mədəniyyəti, memarlığı ilə bağlı maraqlı faktların təqdim ediləcəyi verilişinin həftədə bir dəfə yayımlanacağı planlaşdırılır. Layihənin rəhbəri və aparıcısı Əməkdar mədəniyyət xadimi İlham Rəhimlini bu işi başlamağa sövq edən Şuşa mədəniyyətinin zənginliyi olub. O, düşünür ki, Mədəniyyət paytaxtında insanların marağına səbəb ola biləcək o qədər zəngin tarixi faktlar gizlənib ki, onları xalqa təqdim etməyin əsl zamanıdır.

Verilişin hazırlanmasında böyük bir işçi qrupu gərgin əməklə çalışır. Virtual olaraq Şuşaya səyahətə aparan proqramda tamaşaçılara Əməkdar incəsənət xadimi İlham Rəhimli ilə yanaşı əslən şuşalı, bu tarixi şəhərin hər qarışına bələd olan professor Elçin Əhmədov və “Şuşa qəzeti”nin redaktoru Vasif Quliyev bələdçilik edəcək.

Gərgin iş rejiminə baxmayaraq, bütün yaradıcı heyət böyük ruh yüksəkliyi ilə fəaliyyət göstərir. Layihənin rejissoru Elnur Qədirov deyir ki, gördükləri mənzərəni ürək ağırısı ilə lentə alıblar. Zəngin mədəniyyətə malik Şuşanın düşmən tərəfindən dağıdılmış hazırkı vəziyyətini görüb təsirlənməmək mümkün deyildi. Amma buna baxmayaraq çəkilişi uğurla həyata keçirə biliblər.

İlboyu davam edəcək verilişin hər buraxılışında Şuşa ilə bağlı müxtəlif mövzular işıqlandırılacaq.

Gülnaz Hacıyeva, Zaur Həşimov, Zaur Bayramov