Xalq artisti Cəfər Namiq Kamala həsr olunan “Tale yazısı” kitabı təqdim olundu

18 Yanvar, 10:45 Sosial mediada paylaşın:

Bakı Kitab Mərkəzində Xalq artisti Cəfər Namiq Kamalın həyat və yaradıcılıq yolundan bəhs olunan “Tale yazısı” kitabının təqdimat mərasimi keçirilib.

“Aktyor ömrü boyu müxtəlif səpkili obrazlara həyat verir. Tamaşaçılar hər zaman aktyorun özü ilə yox, onun obrazları ilə görüşürlər. Rejissor aktyorda itdiyi kimi, aktyor da yaratdığı obrazlarda görünməz olur”. Bu fikirlərin yer aldığı “Tale yazı”sı kitabı Xalq artisti Cəfər Namiq Kamalın ömrünün 70, yaradıcılığının 50 illiyinə həsr olunub. Aktyor deyir ki, kitab 2020-ci ildə 70 illik yubileyi ərəfəsində nəşrə hazır olsa da, pandemiya səbəbindən təxirə salınıb.

Kitabın müəllifi, yazıçı-dramaturq Çingiz Ələsgərli “Tale yazı”sının yaranma tarixçəsindən söz açdı. Qeyd olundu ki, kitabda Xalq artisti Cəfər Namiq Kamalın Azərbaycan Dövlət Gənc Tamaşaçılar və Akademik Milli Dram Teatrlarında, o cümlədən tele-tamaşalarda yaratdığı obrazlar haqqında fikirləri öz əksini tapıb. Həmçinin aktyorun müsahibələri, incəsənət xadimlərinin aktyorun yaradıcılığı ilə bağlı düşüncələri yer alıb.

Tədbirdə Xalq artisti Cəfər Namiq Kamalın sənət dostları, tərəf müqabilləri onun “tale yazısındakı” maraqlı, yaddaqalan məqamlardan bəhs etdilər.

Cəfər Namiq Kamalın qardaşı, Xalq artisti İlham Namiq Kamal kitabın ərsəyə gəlməsində əməyi keçən hər kəsə təşəkkürünü bildirdi. 

Ülviyyə Heydərova, Elçin Tağıyev

CANLI YAYIM