Mahnıları ilə Azərbaycan musiqisini zənginləşdirən görkəmli bəstəkar Bəhram Nəsibov… Əsərləri o qədər dillər əzbəri olub ki, çox vaxt xalq mahnısı kimi tanınıb. Bu yaxınlarda bəstəkar haqqında «Nəğmələrdə yaşayan ömür» adlı kitab nəşr olunub. Kitaba sənətkarın 100 adda mahnısının not yazıları daxil edilib.

Gözünü açandan ruhunda bəslədiyi musiqi bir gün Bəhram Nəsibovun zümzüməsində, ifasında üzə çıxdı. Mahnıları o qədər dillər əzbəri oldu ki, çox vaxt «xalq mahnısı» kimi qəbul edildi. Onun musiqisi ən məşhur şairlərin şeirlərini, ən tanınmış müğənnilərin səsini bəzədi. Hətta öz misraları ilə də mahnılara yaraşıq verirdi. Bəhram Nəsibovun hər mahnısı Azərbaycan musiqisinin bu janrının incisinə çevrilsə də, onun özü peşəkar bəstəkar kimi qəbul edilmədi. Bəstəkar diplomunun olmaması sənətkarın üzünə qapıları bağlasa da, Bəhram Nəsibovun mahnıları ürəkdən-ürəyə yol tapdı.

O, bu mahnını Qarabağın ən bəxtəvər günlərində yazsa da, çox sonralar Qarabağ onun da ürək ağrısına çevrilmişdi.

«Ən böyük arzum müharibə bitəndən sonra Qarabağ marşını yazmaqdır», - deyirdi Bəhram Nəsibov.

Birinci Qarabağ müharibəsində cəbhə bölgəsində ifaları ilə əsgərlərə dəstək olan sənətkar göz açdığı Füzuli rayonunun işğalı xəbərinə dözə bilmədi. İnsult onun hələ üzə çıxmayan mahnılarını ürəyində qoydu. Görkəmli bəstəkar 1998-ci ildə dünyasını dəyişsə də, 44 günlük Vətən Müharibəmizdə bəstələri ilə elə bil yenidən doğuldu. «Qarabağ» mahnısı Vətən Müharibəsində müzəffər ordumuzun dilindən düşmədi. Bu mahnı sanki bir marşa çevrildi.

Bu yaxınlarda bəstəkarın oğlu Adil Nəsibovun “Nəğmələrdə yaşayan ömür” kitabı nəşr edilib. Kitabda atası Bəhram Nəsibovun 100 adda mahnısının not yazısı öz əksini tapıb. Kitabın ön sözünün müəllifi Əməkdar İncəsənət Xadimi Gülnaz Abdullazadədir. Kitabın rəyçilərindən biri olan sənətşünaslıq üzrə fəlsəfə doktoru Rauf Bəhmənli deyir ki, nəşrə bəstəkarın bu vaxta kimi ifa olunmayan mahnıları daxil edilib.

Ülviyyə Heydərova