Mədəniyyət Nazirliyi yanında İctimai Şuranın tərkibində faliyyət göstərən işçi qrupu sənətə marağı olan gənclərə ustad dərsləri keçəcək. Bu qərar 2022-ci ilin planlarına dair toplantda müzakirə olunub.

Mədəniyyət Nazirliyi yanında İctimai Şuranın tərkibində 4 işçi qrupu fəaliyyət göstərir. Məqsəd istedadlı gəncləri üzə çıxarmaq, mədəni irsi qorumaq, təbliğ etməkdir. Milli Kitabxanada İctimai Şuranın 2022-ci ilin planlarına dair keçirilən toplantısında bildirildi ki, tanınmış aktyor və bədii qiraətçi, Əməkdar artist Azad Şükürovun rəhbərlik etdiyi qrup sənətə marağı olan gənclərə ustad dərsləri keçəcək.

Bu görüşlərin əsasən mədəniyyət xadimləri ilə təşkili nəzərdə tutulur. Məqsəd onların öz təcrübələrini bölüşməsinə şərait yaratmaq və bununla da bölgələrdə teatrların canlanmasını təmin etməkdir. Sənətşünaslıq üzrə fəlsəfə doktoru Günel Seyidəhmədlinin rəhbərlik etdiyi ikinci işçi qrupun fəaliyyəti mədəni irsimizlə bağlıdır. Xalq artisti Vidadi Həsənovun rəhbərliyi ilə 3-cü qrupa isə ölkədə teatr tamaşaları və festivalların təşkili həvalə olunub. Azərbaycan mədəniyyətinin beynəlxalq aləmdə təbliği ilə bağlı isə əməkdar incəsənət xadimi, musiqişünas Cahangir Səlimxanovun rəhbərlik etdiyi qrup məşğul olacaq.

İclasda 4 işçi qrupundan əlavə 2 işçi qrupunun da yaradılması da müzakirə edildi. Onlardan biri regionlarda, mədəniyyət sahəsində monitorinqlərin aparılmasını həyata keçirəcək. Digəri isə inkluziv işçi qrupudur. Toplantıda o da qeyd edildi ki, özəl teatr ocaqlarında bundan sonra tamaşaların nümayişi ilə yanaşı, sərgilər, kitab təqdimatları və başqa tədbirlərin keçirilməsi də planlaşdırılır.

Sevinc Hidayət, Zaur Dadaşov