Azərbaycan muğam ustaları Sankt-Peterburqda keçirilən “DAIRAFEST” Beynəlxalq Şərq İncəsənəti Festivalında çıxış ediblər.

Festival çərçivəsində təşkil olunan “Azərbaycan musiqisi” adlı konsertdə Əməkdar artist, xanəndə Qoçaq Əsgərovu tarda İbrahim Babayev, kamançada Elnur Mikayılov, nağarada Əməkdar artist Kamran Kərimov müşayiət ediblər. Böyük uğurla keçən konsert çərçivəsində Azərbaycan musiqisi, o cümlədən dəsgahlar, təsniflər və xalq mahnıları səslənib.

Konsert proqramı UNESCO-nun eksperti Sənubər Bağırova və Sankt-Peterburq Mədəniyyət İdarəsinin təşəbbüsü ilə baş tutub.

“DAIRAFEST” Beynəlxalq Şərq İncəsənəti Festivalı Rusiyanın Şimal paytaxtında 2017-ci ildən keçirilir. Festival Şərq və Qərb incəsənətinin dialoqu platforması kimi nəzərdə tutulub.