Bu gün Müzəffər Azərbaycan Ordusu Laçına daxil olub. 28 illik həsrətə son qoyulub. Bu gün bütün Azərbaycan daha həsrətlə deyil, sevinclə Laçınım deyir.

Laçının işğalı Azərbaycanın ürəyini elə yaralamışdı ki, hətta «Fəryad» filminə dəfələrlə baxan tamaşaçıların çoxu Xaçaturyans rolunu canlandıran Xalq artisti Məlik Dadaşovun möhtəşəm ifasından, rəqsindən belə incimişdi. Çünki Laçının işğalı təkcə laçınlıların faciəsi deyildi, o, hamının dərdi idi. Axı Laçın Qarabağın ürəyindən keçən yol idi.

28 il idi ki, Laçının Həkəri çayı lal axırdı, qayaları susmuşdu. Sarı Aşığın bayatılarından qəm-qüssə tökülürdü. Sinəsidolu laçınlılar dağlıq, meşəlik yerləri Laçına bənzətməyə çalışırdı. Amma heç bir dağ-dərə Laçına oxşamırdı. Çünki Qarabağın daş yaddaşı Laçın bənzərsizdir.

Laçın həmişə xalqın dilində, ruhunda olub. Bir vaxtlar Rəşid Behbodovun səsindən aləmə yayılan «Laçın» xalq mahnısı son 28 ilin həsrət nəğməsi oldu. Bu xalq mahnısının ifa versiyaları da ürəyimizə yağ kimi yayılmadı. Göynətdi! Laçınlı xanəndə Məhəbbət Kazımov isə ömrünün sonuna kimi ürəkağrısyla «Laçınım» dedi.

Bu gün təkcə laçınlılar, bütün Azərbaycan daha həsrətlə deyil, sevinclə Laçınım deyir. Laçın laçın vaxtlarına qayıdır. Gözün aydın olsun, Laçın! Azadlığın mübarək!

Ülviyyə Heydərova