Şəhər mədəniyyət mərkəzlərinin fəaliyyəti ilə bağlı videokonfrans keçirilib

25 Aprel, 13:34 Sosial mediada paylaşın:

Aprelin 24-də xüsusi karantin rejimində Respublikamızın regionlarında olan şəhər (rayon) mədəniyyət mərkəzləri və onların filialları tərəfindən əhaliyə göstərilən xidmətlərin yeni forması, həyata keçirilən layihələr, gələcək işlər barədə Mədəniyyət nazirinin müavini Rafiq Bayramov, nazirliyin müvafiq struktur bölməsinin əməkdaşları və ölkənin aparıcı mədəniyyət mərkəzlərinin rəhbərləri, habelə regional mədəniyyət idarələrinin nümayəndələrinin iştirakı ilə videokonfrans keçirilib.

Nazirlikdən bildirilib ki, nazir müavini Rafiq Bayramov ölkə rəhbərliyinin əhalinin sağlamlığına göstərdiyi xüsusi diqqəti, xüsusi karantin rejimində insanlara dövlət səviyyəsində olan qayğını qeyd edərək mədəniyyət sahəsində fəaliyyət göstərən insanların da bu qayğı və diqqəti açıq-aydın hiss etdiyini bildirib.

Qeyd edilib ki, bu dövrdə müəssisələrin idarəçiliyində, habelə əhaliyə göstərilən mədəni xidmətlərin təqdimat formasında uyğunlaşdırılma aparılıb, internet üzərindən texniki vasitələrdən istifadə edilməklə iş qurulub. Nazir müavini əhalinin asudə vaxtının səmərəli təşkilində mədəniyyət mərkəzləri və onların filiallarının üzərinə düşən öhdəlikləri bir daha xatırladaraq postpandemiya dövrünə hazır olmalarını, gələcəkdə öz işlərini daha innovativ vasitələrlə qurmalarını tövsiyə edib. O, nazirlik tərəfindən xalq yaradıcılığının inkişafı, təbliği, əhalinin asudə vaxtının səmərəli təşkili məqsədilə həyata keçirilən “Yaradıcılığı evdə öyrən” və “Evim yeni iş yerim” layihələrinin əhəmiyyətini qeyd edib.

Nazirliyin Xalq yaradıcılığı və mədəni marşrutların inkişafı şöbəsinin müdiri Günel Aslanova xüsusi karantin dövründə internet üzərindən aparılan layihələr, onlayn konsertlər barədə məlumat verib. O, bildirib ki, hər gün çoxsaylı videodərslər #yaradıcılığıevdəöyrən həştəqi ilə sosial şəbəkələrdə paylaşılır. Nazirliyin müəssisələrinin yeni marketinq və menecmentlik üsulları barədə #evimyeniişyerim həştəqi ilə videolar yayımlanır. Eyni zamanda, tezliklə, “9 may Faşizm üzərində qələbə günü”nə həsr edilmiş “Qəhrəman böyüklərim” layihəsinin başlayacağı və ictimaiyyətə geniş məlumat veriləcəyi bildirilib.

Nazirliyin Xalq yaradıcılığı və mədəni marşrutların inkişafı şöbəsinin müdir müavini Vüqar Məmmədov qeyd edilən layihələr barədə mütəmadi olaraq internet üzərindən monitorinq aparıldığını qeyd edib. V.Məmmədov əhaliyə mədəni xidmətlərin göstərilməsi üçün bu layihələri daha aktiv davam etdirməyin vacibliyini söyləyib.

Sonda nazir müavini Rafiq Bayramov mədəniyyət mərkəzləri və onların filiallarının əməkdaşlarına xüsusi karantin rejimi dövründə fəal çalışdıqlarına görə təşəkkürünü bildirib, habelə sahənin inkişafı ilə bağlı təkliflərin hazırlanması barədə tapşırıqlar verib.

CANLI YAYIM