Prezident İlham Əliyevin rəhbərlik etdiyi Azərbaycan bu gün dünyanın siyasi sistemində özünəməxsus yeri ilə seçilir, onunla hesablaşırlar, ona hörmət və ehtiramla yanaşırlar. Çünki o, müsəlman Şərqində ilk dünyəvi dövlət quran, ilk demokratik parlament yaradan, qadınlara ilk dəfə səsvermə hüququ verən ölkənin prezidentidir. O, dərin köklərə bağlı, həm də müasir, çox güclü sosial siyasətə malik, iqtisadi cəhətdən inkişaf etmiş ölkənin rəhbəridir. Xalqa xidmət etmək, hər bir azərbaycanlının prezidenti olmaq onun həyat fəlsəfəsidir.
Prezident İlham Əliyevin milli maraqlara söykənən daxili və xarici siyasəti, seçkiqabağı təşviqat dövründə səsləndirdiyi “Mən hər bir azərbaycanlının Prezidenti olacağam!” ifadəsi qısa müddətdə ona xalq arasında geniş populyarlıq, inam və etibar qazandırdı. Dövlət başçısı bu mühüm hədəflərə çatmaq üçün ilk növbədə ölkəmizin təbii sərvətlərini, insan potensialını və ən önəmlisi, xalqın iradəsini əsas götürdü.
Prezident İlham Əliyev öz fəaliyyəti ilə Azərbaycanın müstəqillik dayaqlarını daha da möhkəmləndirib, ölkəmizin dostlarının sayı çoxalıb, bizimlə müttəfiqlik etmək istəyənlərin sırasına yeniləri əlavə olunub. Xarici siyasətdə dostluq və qarşılıqlı etimad prinsiplərinə söykənən Azərbaycan dünyada etibarlı tərəfdaş kimi tanınıb və bu, özünü ölkəmizin BMT Təhlükəsizlik Şurasının qeyri-daimi üzvü seçilməsində, qarşıdakı illərdə 120 dövlətin təmsil olunduğu Qoşulmama Hərəkatına sədrlik etməsində də göstərir.
Prezident İlham Əliyev Azərbaycanı Avropanın enerji təhlükəsizliyində mühüm faktora çevirib. Ölkəmiz artıq Cənub Qaz Dəhlizinin və TANAP layihəsinin icrasında aparıcı ölkədir. “Azəri”, “Çıraq” və “Günəşli” yataqlarının birgə işlənməsi və neft hasilatının pay bölgüsü haqqında yeni sazişin imzalanması isə Azərbaycanın dünya enerji sənayesində həlledici faktor olduğunu bir daha təsdiqləyib.
Prezident İlham Əliyevin həyata keçirdiyi siyasət nəticəsində ölkədə bazar iqtisadiyyatına keçid prosesi başa çatıb. İqtisadiyyatın şaxələndirilməsi, qeyri-neft sektorunun və bölgələrin davamlı yüksəlişi məqsədilə regionların sosial-iqtisadi inkişafına dair dörd dövlət proqramı qəbul olunub. İqtisadiyyatın ümumi artım tempi qeyri-neft sektorunun, sənaye istehsalının və qeyri-neft ixracının dəfələrlə artmasına gətirib çıxarıb. Ənənəvi kənd təsərrüfatı sahələrinin dirçəldilməsi yolunda genişmiqyaslı layihələr icra olunub. Ölkədə 2 milyondan çox yeni iş yeri açılıb, işsizliyin və yoxsulluğun səviyyəsi kəskin şəkildə aşağı düşüb. Davos İqtisadi Forumu Azərbaycan iqtisadiyyatını rəqabətqabiliyyətliliyinə görə dünyada 35-ci yerdə qərarlaşdırıb.
Artıq Azərbaycan nəhəng layihələr icra edir. Xalq arasında, o cümlədən beynəlxalq miqyasda böyük maraq toplayan “ASAN xidmət” mərkəzləri, “DOST” agentliyi fəaliyyətə başlayıb. 2013-cü ildən dünya kosmos klubunun fəal üzvünə çevrilən Azərbaycanın indi orbitdə 3 peyki var. Ölkənin elektrik enerjisi potensialı xeyli artıb, 30 elektrik stansiyası tikilib, ölkə üzrə təbii qaz təchizatı 95 faizə yüksəlib. Oğuz-Qəbələ-Bakı su kəməri layihəsi uğurla icra edilib, ölkəmizin nəqliyyat müstəqilliyi də təmin olunub, 15 min kilometrdən çox uzunluğu olan beynəlxalq standartlara uyğun avtomobil yolları salınıb. Azərbaycan beynəlxalq “Şimal-Cənub” nəqliyyat dəhlizi layihəsinin reallaşması üçün bütün işləri başa çatdırıb. Bakını Xəzər hövzəsində müasir logistika və nəqliyyat mərkəzinə çevirməyə imkan verən beynəlxalq dəniz ticarət limanı kompleksi tikilib. Bakı Gəmiqayırma Zavodu işə düşüb, 6 beynəlxalq hava limanı istismara verilib. Müstəqillik dövrünün ən böyük layihələrindən biri olan Bakı-Tbilisi-Qars dəmir yolu da uğurla istifadəyə verilib.
Dünyanın ən güclü 50 ordusundan birini yaradan Prezident İlham Əliyev Silahlı Qüvvələrin döyüş qabiliyyətinin, texniki təchizatının yüksək səviyyədə qurulmasında mühüm rol oynayıb, ölkədə güclü hərbi sənaye kompleksi yaradılıb. Bu ordu 2016-cı ilin aprelində işğal altında qalan Füzuli, Cəbrayıl və Ağdərə rayonlarının ərazilərinin bir qismini düşməndən təmizləyib, 2018-ci ildə Naxçıvan Muxtar Respublikasının 11 min hektardan çox ərazisini işğaldan azad edib. Dövlət başçısının fəaliyyəti sayəsində beynəlxalq birlikdə bir əminlik yaranıb ki, Dağlıq Qarabağ əzəli Azərbaycan torpağıdır və Azərbaycan öz ərazisində ikinci erməni dövlətinin yaranmasına heç vaxt razı olmayacaq.
Prezident İlham Əliyevin fəaliyyətinin əsas istiqamətlərindən biri də məcburi köçkünlərin həyat şəraitinin yaxşılaşdırılmasıdır. Bu məqsədlə indiyə qədər ölkədə 100-dən çox qəsəbə və şəhərcik salınıb, orada 300 min nəfər məskunlaşıb. Cəbrayıl rayonunun Cocuq Mərcanlı kəndində aparılan quruculuq işləri “Böyük Qayıdış”ın əsasını qoyub. Şəhid ailələrinin sosial problemlərinin həlli işində də dövlət hər zaman öncül mövqedə dayanıb. Ölkədə milli-mənəvi dəyərlərin qorunması, islamın müqəddəs ibadətgahlarının bərpası, bununla yanaşı, digər dinlərə göstərilən diqqət və qayğı Azərbaycanı dünyada dialoq və tolerantlıq məkanına, multukulturalizm mərkəzinə çevirib.
Prezident İlham Əliyev deyir ki, ləyaqəti, ədəb-ərkanı, insanlara xoş münasibəti, vətənpərvərlik hissini heç bir halda keçmişdə qoymaq olmaz. Həmişə Vətəni sevmək lazımdır. Dövlət başçısı bütün təmaslarında ilk növbədə öz səmiyyəti ilə insanları cəlb edir. Öz güclü iradəsi, liderlik keyfiyyətləri ilə milyonları ətrafında toplayaraq müstəqil və güclü Azərbaycan uğrunda çalışır. İlham Əliyev xalqdan aldığı gücü öz fəaliyyəti ilə xalqa qaytarır.
