UNESKO-nun Baş Konfransının 40-cı sessiyası çərçivəsində qurumun elmlər komissiyasının iclası keçirilib.
İclasda ölkəmizi AMEA-nın akademik Ziya Bünyadov adına Şərqşünaslıq İnstitutunun direktor müavini, akademik Şahin Mustafayev və UNESKO yanında daimi nümayəndəliyimizin III katibi Nigar Qurbanova təmsil ediblər.
Komissiya iclasında 2022-2029-cu illər üçün strateji layihə və 2022-2025-ci illər üçün proqram və büdcə layihəsi, 2019-2021-ci illər üçün büdcə, qurumun himayəsi altında institut və mərkəzlərin yaradılması və digər məsələlər müzakirə edilib.
Akademik Şahin Mustafayev fundamental elmlərin inkişafı baxımından 2022-ci ilin “Davamlı inkişaf naminə beynəlxalq elmlər günü” kimi qeyd edilməsi təklifini irəli sürüb və bu təklif iclasda qəbul olunub. Ş.Mustafayev UNESKO-nun “Böyük İpək Yolu” proqramına toxunaraq, ölkəmizin bu istiqamətdə rolu, bu proqramın ölkəmiz və digər ölkələr üçün əhəmiyyətindən danışıb.
Bildirib ki, Azərbaycan UNESKO-nun İpək Yolu seriya nominasiyası layihəsinə qoşulub. Bu sahədə Böyük İpək Yolu ölkələri və UNESKO arasında geniş əməkdaşlıq perspektivlərinin olduğunu vurğulayıb. Ölkəmizin bu istiqamətdə öz fəaliyyətini davam etdirəcəyini qeyd edib.
