Böyük Britaniyanın nüfuzlu “Space Entertainment Enterprise” şirkəti 2024-cü ildə kosmosda əyləncəli məzmunda verilişlər hazırlamaq və yayımlamaq üçün kinostudiya yaratmağı planlaşdırır.

Hollivud ulduzu Tom Kruzun baş rolu canlandırdığı kosmik filmin birgə istehsalı ilə məşğul olan Britaniyanın “Space Entertainment Enterprise” şirkəti 2024-cü ildə kosmosda əyləncəli məzmunda verilişlər hazırlamaq və yayımlamaq üçün kinostudiya qurmağı planlaşdırır. “SEE-1” adlanan modul kino, televiziya, musiqi və idman tədbirləri, eləcə də mikroqravitasiya şəraitində, alçaq orbitdə məzmun yaratmaq istəyən rəssam, prodüser və digər yaradıcı insanlar üçün nəzərdə tutulub.

Kinostudiya televiziyanın yaradılmasına, istehsalına, səsyazmasına və canlı yayımına imkan verəcək. “Space Entertainment Enterprise”-nin icraçı direktoru Riçard Constonun sözlərinə görə, “SEE-1” bəşəriyyətin başqa reallığa keçməsi və kosmosda yeni səhifə açması üçün inanılmaz fürsətdir.

Kosmosda kinostudiya alçaq orbitdə ABŞ-ın “Axiom Space” şirkəti tərəfindən inşa ediləcək. “SEE-1” kosmik moduluna 2 milyard dollarlıq vəsait ayrılacaq ki, bu da qlobal əyləncə sənayesini genişləndirməyə imkan verəcək.

Qeyd edək ki, ötən ilin oktyabrın 5-də dünya kino sənayesində ilk dəfə olaraq kosmosda bədii film də çəkilib. Rusiyanın Birinci kanalı, Rosmoskos və “Yellow, Black, White”in birgə layihəsi olan “Çağırış” bədii dramı üçün Rusiyanın Əməkdar artisti Yulia Peresild, rejissor Klim Şipenko 12 gün müddətində kosmosda film çəkilişlərini uğurla həyata keçiriblər.

Ülviyyə Heydərova