"Euronews" kanalı İsmayıllı rayonunun Lahıc qəsəbəsi haqqında reportaj hazırlayıb. Lahıc qəsəbəsi Bakıdan üç saatlıq məsafədə, Nial dağ silsiləsindən keçən vadidə yerləşir. Dar körpülər, çay yatağı boyunca tikilmiş daş evlər, sənətkarlıq emalatxanaları - deyəsən, keçən əsrdən bəri burada çox az şey dəyişib...

Bir neçə əsrdir ki, Lahıc sənətkarlar şəhəri kimi tanınır. Şəhər dabbağlıq və xalçaçılıqla məşhurdur. Ancaq qəsəbəyə ən böyük şöhrəti miskərlik sənətinin ustaları gətiriblər. Yüksək sənətkarlıqla hazırlanmış mis qablar da kəndin simvoluna çevrilib.

Mis emalı metallurgiyanın ən qədim formasıdır. Müxtəlif növ mis qabların hazırlanması ənənəsi və naxış üslubları min illər əvvələ gedib çıxır. Çəkic və kəsiklə işləyən misgərlər uşaq yaşlarından öyrəndiklərinə bu gün də sadiqdirlər. Bu isə güc, dözüm və səbr tələb edən çətin bir işdir...

Lahıcda hazırlanan qab lar, Luvr da daxil olmaqla, dünyanın ən məşhur muzeylərində nümayiş olunur. Elə Azərbaycanın özündə də bu nəfis əl işlərinə yüksək tələbat var. Lahıc Tarix-Diyarşünaslıq Muzeyinin direktoru Kamal Əliyev bildirib ki: - "Lahıcda mis emalının tarixi bir neçə əsr əvvələ gedib çıxır. 2015-ci ildə Lahıcın misgərlik sənəti UNESCO-nun bəşəriyyətin qeyri-maddi mədəni irsinin şah əsərləri siyahısına daxil edilib".