“Ey həyat, sən nə qəribəsən?”, “Xədicə”, “Bakının qızları”, “Reyhan”, “Mən gəzirəm hər yanı”, “Almanı atdım xarala” və sair kimi mahnıları  bu gündə dillər əzbəri olan, sevilən və böyük həvəslə dinlənilən “Qaya” qrupu... Əfsanəvi qrupun bədii rəhbəri və solisti olmuş Xalq artisti Teymur Mirzəyev 86 yaşında vəfat edib.

20-ci  əsrin 60-cı illərinin əvvəllərində Asəf Zeynallı adına Orta İxtisas Musiqi Məktəbində təhsil alan dörd gənc - Teymur Mirzəyev, Rauf Babayev, Arif Hacıyev və Adil Nəzərov vokal kvartet yaratmaq fikrinə düşürlər. İlk çıxışları tələbə yığıncaqlarında, musiqi məktəbinin kiçik otaqlarında baş tutsa da, 1961-ci ildə  kollektiv “Bakı vokal kvarteti” adı ilə fəaliyyət göstərməyə başlayıblar. Ansamblın yaradıcısı, bədii rəhbəri və solisti Teymur Mirzəyev kollektivlə  birgə musiqi mədəniyyətimizi  Almaniya, Avstriya, Amerika, Türkiyə, Hindistan, İsrail, Kanada, Gürcüstan, Ukrayna kimi ölkələrdə məharətlə  təbliğ edib və sevdiriblər. Kvartet ilk  uğurunu isə  1966-cı ildə Moskvada keçirilən “Ən yaxşı sovet mahnısı ifası” üzrə Ümumittifaq müsabiqəsində qazanıb. Ansamblın “Ey həyat, sən nə qəribəsən?”, “Xədicə”, “Bakının qızları”, “Reyhan”, “Mən gəzirəm hər yanı”, “Almanı atdım xarala” və s. kimi mahnıları  bu gündə sevilir və böyük həvəslə dinlənilir. Teymur Mirzəyev klassik estrada, caz ifaçılığı məktəbinin yüksək ənənələri əsasında istedadlı ifaçılar nəsli yetişdirib. 1998-ci ildə İsrailin Arad şəhərinə köçən Teymur Mirzəyev  və ömrünün son illərinədək burada yaşayır. Ömrünün 86-cı payızında dünyadan köçən gözəl sənətkarın musiqi əsərləri illər keçsə də unudulmayacaq və neçə-neçə gənc nəslin bədii zövqünü oxşayacaq.

Ayşəm Bəşirova