Başqırdıstanda CIOFF®️ VI Ümumdünya Folkloriadası davam edir. “Eurovision-2021” festivalından sonra ikinci irimiqyaslı hadisəyə çevrilən Folkloriada dünyanın 37 ölkəsindən 2700 iştirakçını bir yerə toplayıb.

“Ufa-Arena” Buz Sarayında keçirilən açılış mərasimini Soçi Olimpiya Oyunlarında çalışan mütəxəssislər qrupu ərsəyə gətirib.

Başqırdıstan Folkloriadasında iki dünya rekorduna imza atılıb. İlk dəfə olaraq, dünyanın 37 ölkəsindən 71 millətin təmsilçisi olan 2700 nəfər yallı gediblər. Rəqsdən əvvəl 37 ölkədən olan iştirakçıların milli geyimdə möhtəşəm paradı olub. Bu günlərdə Ufada olan əcnəbi turistlər də çoxmillətli yallı rəqsinə qoşulublar.

Azərbaycanı təmsil edən “Ritm” ansamblı Başqırdıstan Respublikasının bir neçə şəhərində çıxış edib. Yerli sakinlər bu ansamblı çox səmimi qarşılayıb, təqdim edilən proqramın rəngarəngliyindən və orijinallığından zövq alıblar. Azərbaycan diasporunun çoxsaylı nümayəndələri də onları dəstəkləməyə gəliblər.