Özbəkistanda Heydər Əliyev adına Azərbaycan Mədəniyyət Mərkəzinin layihəsi ilə “Vikipediya” onlayn ensiklopediyasında Azərbaycanın Kəlbəcər rayonunun Susuzluq kəndi yaxınlığında törədilmiş partlayış ilə bağlı özbək dilində yeni məqalə yaradılıb.

Məqalədə qeyd olunur ki, Azərbaycanın Kəlbəcər rayonunun ərazisi 1993-cü ildə Birinci Qarabağ müharibəsi zamanı Ermənistan silahlı qüvvələri tərəfindən işğal edilib. İşğal nəticəsində regiondan yaşayan 60 min azərbaycanlı qaçqın düşüb, 150-dən çox azərbaycanlı isə girov götürülüb.

Onlayn ensiklopediyanın bu məqaləsində 44 günlük Vətən müharibəsi haqqında ətraflı məlumat verilib. Bildirilir ki, 2020-ci il 10 noyabr tarixli üçtərəfli Bəyanata əsasən Kəlbəcər rayonu Azərbaycanın nəzarətinə qaytarılıb.

Məqalədə iyunun 4-də azərbaycanlı jurnalistlər - AzTV-nin operatoru Sirac Abışov və AzərTAc-ın müxbiri Məhərrəm İbrahimov, həmçinin, Kəlbəcər Rayon İcra Hakimiyyəti başçısının Susuzluq kənd inzibati ərazi dairəsi üzrə nümayəndəsinin müavini Arif Əliyevin xidməti vəzifələrini yerinə yetirərkən Kəlbəcərdə minaya düşərək həlak olmaları və daha bir neçə nəfərin yaralanması haqqında məlumatlar əks olunub. Bununla yanaşı, erməni vandalizminin daha bir nümunəsi ilə bağlı bəyanat verən beynəlxalq təşkilatların siyahısı təqdim edilib.

Məqaləni https://uz.wikipedia.org/wiki/Susuzlug_qishlog%CA%BBi_yaqinida_portlash linkindən oxumaq olar.