Xalq artisti Şəfiqə Məmmədovanın doğum günüdür

30 Mart, 14:48 Sosial mediada paylaşın:

Şəfiqə Məmmədova… Xalq artisti, dövlət mükafatı laureatı. Yaratdığı müxtəlif obrazlarla neçə-neçə tamaşaya, filmə ruh verən sənətkar bu gün doğum gününü qeyd edir. Şəfiqə Məmmədova kinoya gəlişiylə təkcə Qaraca qıza sillə vurmadı, Azərbaycan kinemotoqrafiyasını yaxşı mənada sirkələdi. Bu həm də o dövr idi ki, aktrisa hələ Azərbaycan Dövlət Teatr İnstitutunun Musiqili Komediya aktyorluğu fakültəsində təhsil alırdı. Şəfiqə Məmmədova elə tələbəlik illərindən teatrda, kinoda öz cığırını açsa da, heç vaxt ixtisası üzrə, yəni musiqili komediyadada rol almadı.

Tamaşaçı Şəfiqə Məmmədovanı daha çox dramda, faciədə gördü.  Bununla belə aktrisa faciəyəyə komediya qatmağı bacarırdı. Çünki o, komediyanın kökündə faciə olduğunu gözəl bilir.

Şəfiqə Məmmədovanın yaratdığı rollar içində yeganə qəhrəmandır ki, bu obrazın adı yoxdur. Lakin aktrisa bənzərsiz ifası ilə “Cəbiş müəllimin arvadı” kimi titrlərdə yer alan qəhrəmanı zirvəyə qaldırdı. Həyatda əsəbi, hikkəli, təkəbbürlü, bununla belə ailəsinin qayğısını çəkən qadınlara rast gələndə gözlər önünə Cəbiş müəllimin arvadı gəlir.

Görkəmli rejissor Rasim Ocaqov çəkəcəyi «İstintaq» filminə müstəntiq Seyfinin arvadı rolu üçün heç də böyük axtarış etmədi. Əmin idi ki, Şəfiqə Məmmədova Gülya obrazının öhdəsindən məharətlə gələcək. Aktrisa elə bil Gülya yaratdı ki, o, məhz canlandırdığı bu obraza görə SSRİ Dövlət Mükafatına layiq görüldü.

Şəfiqə Məmmədova istər kinoda, istərsə də teatrda qəhrəmanlarına eyni sevgiylə yanaşırdı. Bir vaxtlar onun üçün «Hamlet»də Gertrudanı oynamaqla, «Dəli yığıncağı»nda Pırpız Sonanı yaratmaq arasında heç bir fərq yox idi.

İndi isə… Şəfiqə Məmmədova sənətdə olsa da nə teatrdadır, nə kinoda. Rollar ondan deyil, o rollardan imtina edir. Aktrisa uzun illərdir ki,  məhz qəhrəman axtarışındadır. Elə bir qəhrəman ki, bütün bacarığını sərqiləyə bilsin. Bəlkə o qəhrəman Şəfiqə Məmmədovanın elə özüdür?

 

Ülviyyə Heydərova

CANLI YAYIM