23 fevral Həsənağa Turabovun xatirə günüdür

23 Fevral, 15:02 Sosial mediada paylaşın:

Onu hamı tanıyır, hətta Azərbaycandan kənarda da. Çəkildiyi filmlər Sovet dövründə Amerikada belə göstərilib. Təkcə “Yeddi oğul istərəm”  filmində Gəray bəy obrazını demək kifayədir. Xalq artisti Həsənağa Turabovun bu gün xatirə günüdür.

Allah ondan nəinki səsi, heç nəyi əsirgəməmişdi. Bir aktyora nə lazımdırsa, hamısını ona vermişdi - xarizma, əzəmətli səs, qeyri-adi istedad. Onun timsalında milli kinomuzun və səhnəmizin ən parlaq obrazlarını görüb sevmişik. Turabov o sənətkarlardandır ki, uşaqdan-böyüyə hər kəs onu da, oynadığı rolları da gözəl xatırlayır. Bunun üçün heç filmin adını bilməyə ehtiyac yoxdur. Təkcə onun adı  kifayətdir - Həsənağa Turabov. “Yeddi oğul istərəm”də Gəray bəy, “Qanlı zəmi” də qaçaq Nəbi, “Bəyin oğurlanması”nda rejissor Əsəd, “Qəm pəncərəsi”ndə Mirzə Cəlil, “Yaramaz”da Qəzənfər, “Təhminə”də Dadaş, “Qorxma, mən səninləyəm”də əzazil bəy Cəfər, “Dantenin yubileyi”ndə aktyor olmaq üçün özünü oda atan, istedadsız Kəbirlinski. “Dərviş Parisi partladır”da atları özündən də çox sevən, vecsiz Rəşid bəy.

Onun kino yaradıcılığı hər birimizin gözlərin önündədir. Teatr səhnəsində də Həsənağa Turabov qısa müddət ərzində yerli və dünya drammaturqlarının əsərlərində baş rolların ifaçısı kimi teatrın aparıcı simalarından birinə çevrilib. Xalq artisti bir çox əsərlərin qəhrəmanlarına səhnə həyatı verərək ədəbiyyatın daim diqqət mərkəzində olan problemlərini bütün çalarları ilə tamaşaçıların diqqətinə çatdırıb. Biz tamaşaçılarına isə onu həyata gəlişinin 83,  gedişinin isə 18-ci ilində ehtiram və sevgi ilə xatırlamağı bəxş elədi...

 

Mahmud Yaqub

CANLI YAYIM