Azərbaycanlı tələbə Çexiyada "İlin adamı" seçilib

18 Fevral, 13:36 Sosial mediada paylaşın:

Azərbaycanlı tələbə, Beynəlxalq müsabiqələr laureatı Canel Nəcəfli Çexiyada "ilin adamı" seçilib.

Çexiyada "Orfeus" adlı mükafata layiq görülən, incəsənət sahəsində mühüm rol oynayan yerli tələbələrə “İlin adamı” adı verilir. İllərdir bu ənənə yerli əhali arasında mötəbər yarışlardan sayılır və indiyədək bu ad yalnız çexlərə verilib. Ötən ilin dekabrında həmyerlimiz Canel Nəcəflinin də sənədləri 2020-ci il nominasiyasında iştirak üçün təqdimata yollanıb. Sənədlər onun Çexiyadakı müəllimi Roman Fedçuk və təhsil aldığı Konservatoriyanın rektoru Miroslav Breyxa tərəfindən hazırlanıb.

Çexiya tarixində ilk dəfə olaraq bu nominasiyada skripka ifaçısı Canel Nəcəfli qalib gələrək, “İlin adamı” seçilib. Nüfuzlu "Orfeus" mükafatının rəsmi təqdimatı pandemiyanın Çexiyada yaratdığı kəskin fəsadların aradan qaldırılmasından sonra həyata keçiriləcək.

Qeyd edək ki, bir sıra beynəlxalq müsabiqə və festivalların qalibi olan musiqiçi Bakı şəhərində doğulub. Uşaq yaşlarında Xalq artisti Oqtay Zülfüqarovun yaratdığı "Aysel" teatrının üzvü olub. Bülbül adına Orta İxtisas Musiqi Məktəbinin yetirməsi olan Canel Nəcəfli musiqi təhsili Çexiyada davam etdirir.

 

Ülviyyə Heydərova

CANLI YAYIM