Azərbaycanın  müstəqilliyi və azadlığı uğrunda mübarizədə şəhid olmuş həmvətənlərimizin xatirəsi ”Azərkitab" Kitab Mərkəzində də anılıb.  Karantin qaydaları çərçivəsində 20 Yanvar faciəsinin 31 illiyinə həsr olunmuş tədbir onlayn keçirilib.

Mərkəzdə keşirilən tədbirdə “20 Yanvar” şəhidlərinin xatirəsi bir dəqiqəlik sükutla yad olunub, sonra faciə ilə bağlı sənədli film nümayiş edilib. ”Azərkitab" Kitab Mərkəzinin layihə rəhbəri Sabir Həsənov 1990-cı il yanvarın 20-də sovet ordusunun paytaxtda, eyni zamanda, bölgələrdə həyata keçirdiyi qətliamdan, günahsız insanların  həyatlarını itirməsindən danışıb. Bu il şəhidlərimizi qələbə qazanmış bir ölkənin vətəndaşları kimi yad etməyimiz xüsusi vurğulanıb.

”Azərkitab" Kitab Mərkəzinin layihə rəhbəri Sabir Həsənov bildirib ki: "Biz artıq bu gün qələbə ruhunda çıxışlar etdik, azad, müstəqil bir dövlətin qalib bir vətəndaşı kimi çıxış elədik. Bu gün qürur hissi ilə deyirəm ki, şəhidlərimizin ruhu şaddır, biz onların qanını yerdə qoymadıq, müzəffər ordumuz bu qələbəni bütün dünyaya çatdırdı".

Videobağlantı ilə davam edən tədbirdə şəhidlərin yaxınları, gənclər, qeyri-hökümət təşkilatlarının üzvləri, ziyalılar, dövlət və KİV təmsilçiləri iştirak ediblər. Sonda qəhrəmanlarımız haqqında kitabların nəşr edilməsinin vacibliyi və bu istiqamətdə işlərin görülməsi də xüsusi qeyd olunub.