Təsəvvür edin ki, 50 il bundan əvvəl Amerikanın dörd qaradərili məşhuru saatlarla irqçilikdən, dindən və siyasətdən danışır. “Mayamidə bir gecə” bədii filmində dörd nüfuzlu qaradərilinin görüşündən bəhs edir.

“Mayamidə bir gecə” bədii filmi dünyaşöhrətli boksçu Kassius Kley, soul müğənnisi Sem Kuk, insan hüquqları müdafiəçisi Malkolm İks və fulbolçu Cim Braunun görüşündən bəhs edir. Filmin ssenari müəllifi Kemp Pauers söyləyir ki, bu görüş həqiqətən 1964-cü ildə baş verib. Lakin filmdə qəhrəmanların söhbətləri təxəyyül məhsuludur”.

Mayami-Biçdə 22 yaşlı Kassius Kley ağırçəkili rəqibi Sonni Listona qalib gələndən sonra boksçu otağına qayıdır və onlar səhərə kimi söhbət edirlər. Sabahı günü Kassius Kley mətbuat qarşısına çıxaraq İslam dinini qəbul etdiyini, özünə isə Məhəmməd Əli adını qoyduğunu açıqlayır.    

Filmin rejissoru “Oskar” mükafatı laureatı aktrisa-rejissor Regina Kingdir. Bu, Kingin rejissor kimi debütüdür. King söyləyir ki, rollardan birini canlandıra bilməsə də filmin rejissoru olmaqdan məmnundur.

“Mayamidə bir gecə” filmində Məhəmməd Əli rolunu kanadalı Eli Hari, müğənni Kuk obrazını Lesli Od-kiçik canlandırıb. Aldis Xoc futbolçu Cim Braunu, Kinqsli Ben-Adir siyasətçi Malkolm İks rolunu ifa edib. Ekran əsəri ilk dəfə 77 Venesiya Film Festivalında müsabiqədən kənar nümayiş etdirilib.

Ülviyyə Heydərova