Mədəniyyət Nazirliyinin "Xristian irsimizi tanıyaq" layihəsi davam edir. Layihə çərçivəsidə Şəkidə, Qaxda, Qəbələdə yerləşən kilsələr haqqında videoçarxlar təqdim edilib. Bu dəfəki video isə Bakıda yerləşən provaslav kilsələrin biri haqqındadır.

Mədəniyyət Nazirliyi "Xristian irsimizi tanıyaq" layihəsi çərçivəsində təqdim edilən növbəti vidoçarx Müqəddəs Jen-Mironosets pravoslav kilsəsinə həsr olunub. Müqəddəs Mürdaşıyan Zənənlər Kafedralı kimi də tanınan tikili 1909-cu ildə memar Fyodor Verjbitskinin layihəsi əsasında inşa olunub. Kilsə Azərbaycan milyonçusu və xeyriyyəçisi Hacı Zeynalabdin Tağıyevin şəxsi maddi yardımı və ianələr hesabına ərsəyə gəlib.

Rus memarlığı üslubunda tikilən kilsə 1920-ci ildə Sovet hakimiyyəti dövründə ilk bağlanan ibadət yerlərindən biri olub. Kommunist rejimi vaxtında  anbara çevrilən tikili bir müddət sonra idman zalı kimi fəaliyyət göstərib. Lakin Azərbaycan müstəqillik qazandan sonra məbəddə təmir bərpa işləri aparılıb və ibadət üçün açılıb.

2001-ci ildə Moskvanın və bütün Rusiyanın Patriarxı II Aleksinin Azərbaycana səfəri zamanı bu məbədi müqəddəs elan edib və ona baş kafedral kilsə statusu verib. İkinci həyat qazanan ibadət evi həm də Azərbaycanda müxtəlif dinlərə göstərilən tolerantlığın əsas göstəricilərindən biridir. Multikultral dəyərlərə böyük ehtiramın nəticəsidir ki, bu gün də kilsədə provaslavlar bütün dini ayinləri rahatlıqla icra edirlər.

“Jen Mironosets” kilsəsində xristian ənəsinə uyğun olaraq, müqəddəs Varfolomeyin cəsədinin qurumuş qalıqları saxlanılır. Qeyd edək ki, Varfolomey Bakı şəhərinin himayəçisi olub.

“Jen Mironosits” kilsəsi bu axşam xristian dünyasında ən əlamətdar tarixini – İsa məsihin Mövludunu qeyd etməyə hazırlaşır. Provaslavların dini bayramı olan Milad ilin birinci ayının 6-cı günü müxtəlif dini ayinlərin keçirilməsi ilə müşayit olunur. Kilsədə bu məqsədlə küknar ağacları bəzədilib və dini instalyasiyalar qurulub.