Çinin Pekin və Quanqjo şəhərlərində IV Beynəlxalq İpək Yolu Teatrlar Liqasının onlayn konferensiyası və forumu keçirilib. Forumda ilk dəfə olaraq Dövlət Akademik Opera və Balet Teatrı bu mötəbər təşkilata üzv seçilib.

2016-cı ildən Çində fəaliyyət göstərən Beynəlxalq İpək Yolu Teatrlar Liqasına 42 ölkədən 124 teatr üzv olub. Dövlət Akademik Opera və Balet Teatrının bu  təşkilata üzv seçilməsi Azərbaycan mədəniyyətinin tanıdılması və təbliğatına böyük töhfədir. Konfransın açılışında  Azərbaycanın Çindəki səfiri Əkrəm Zeynallı qonaqları salamlayıb, ölkəmizin İpəkyolu regionundakı əhəmiyyətindən danışıb. Tədbirdə  bir çox ölkələrin teatr, musiqi təşkilatlarının rəhbərləri çıxış ediblər. Dövlət Akademik Opera və Balet Teatrının adından Əməkdar artist, beynəlxalq müsabiqələr laureatı, Çinin Kunminq Filarmonik Orkestrinin baş dəvətli dirijoru Əyyub Quliyev iki məruzə ilə çıxış edib.

Məruzə ilə bərabər forumda Azərbaycan Dövlət Akademik Opera və Balet Teatrına həsr olunan video çarxlar da təqdim olunub. Forumun sonunda dünya şöhrətli bəstəkar Tan Dun və görkəmli dirijor Şarl Dyütüa “İpək Yolu” liqasına bədii üzv seçiliblər.