Özbəkistanda Azərbaycan kinosu günləri keçirilib

19 Sentyabr, 17:27 Sosial mediada paylaşın:

XIV Daşkənd Beynəlxalq Film Festivalı çərçivəsində MDB ölkələrinin kinostudiya rəhbərlərinin növbəti görüşü keçirilib.

Görüşdə Kino Təşkilatlarının Beynəlxalq Yaradıcılıq Birliyi adlı qurumun yaradılması, onun nizamnaməsi, strukturu, təqvim planı, həmçinin Kinostudiyaların “Qızıl kolleksiyası”na daxil olan filmlərin nümayişlərinin təşkili məsələləri müzakirə olunub.

Birliyin məqsədi kino sənayesinin birgə inkişafı, kinematoqrafiya sahəsində mədəni irsin qorunub saxlanılması və dəstəklənməsi, eləcə də kinematoqrafiya vasitəsilə milli mədəniyyətlərin müasir təmsil formalarının inkişafının hərtərəfli təşviqidir. Tədbirdə ölkəmizi “Azərbaycanfilm” kinostudiyasının direktoru Nazim Hüseynov təmsil edib. Direktorların dünyaşöhrətli kinorejissor, prodüser Kşiştof Zanussi ilə görüşü baş tutub.

Xatırladaq ki, sentyabrın 13-dən 18-dək keçirilən festivalda 40 ölkədən 500-dən çox kinematoqrafçı iştirak edib. Festival çərçivəsində 150 bədii, sənədli və qısametrajlı film nümayiş etdirilib. Həmçinin Buxara və Daşkənd şəhərlərində “Azərbaycan kinosu günləri” keçirilib. Kino günləri çərçivəsində İlqar Nəcəfin “Suğra və oğulları” bədii, Ayaz Salayevin “Torpaq” sənədli filmi nümayiş etdirilib.

Qeyd edək ki, festivalın münsiflər heyətində beynəlxalq kino festivallarının rəhbərləri, görkəmli kino xadimləri yer alıblar. “Azərbaycanfilm” kinostudiyasının Ekspert Şurasının sədri, Əməkdar incəsənət xadimi, kinoşünas Ayaz Salayev münsiflər heyətinin üzvü olub.

CANLI YAYIM