Malazgirtdə qurulan Azərbaycan çadırında ölkəmizə dair həqiqətlər təbliğ olunur

25 Avqust, 16:18 Sosial mediada paylaşın:

Türkiyədə Malazgirt Zəfərinin 951-ci ildönümü münasibətilə möhtəşəm təntənəli tədbirlər təşkil olunub.

Bu məqsədlə Bitlis vilayətinin Ahlat rayonunun Çarho bölgəsində 150 min kvadratmetr ərazidə milli park, 120 kvadratmetr sahədə “1071 Sultan Alparslan otağı” və 51 çadır qurulub. Azərbaycan üçün çadır milli parkın ən cəlbedici məkanında ayrılıb.

Türkiyənin Qars şəhərindəki baş konsulluğumuz ölkəmizə dair həqiqətlərin təbliği məqsədilə Azərbaycan çadırında sərgilər təşkil edib. Azərbaycan çadırında Qarabağ Zəfərini, eləcə də Şuşa şəhərinin füsunkar görünüşünü əks etdirən fotolar, milli mətbəximizdən nümunələr, yerli məhsullarımız, mədəniyyətimizi və tariximizi özündə ehtiva edən nadir əsərlər sərgilənir.

Çadırda, həmçinin milli musiqi nümunələrimiz səsləndirilir.

Bitlis valisi Oktay Çağatay, Ahlat rayon bələdiyyəsinin sədri Abdülalim Mümtaz Çoban, Türkiyə Oxçular Vəqfinin sədri Əli Heydər Yıldız və digər vəzifəli, nüfuzlu şəxslər Azərbaycan çadırını ziyarət ediblər.

Xatırladaq ki, Bitlis vilayətinin Ahlat rayonu ərazisində təşkil olunan mərasim müxtəlif bölmələrdən ibarətdir. Ayrı-ayrı ölkələrlə yanaşı, Türkiyənin əksər bölgələri burada müxtəlif formalarda təmsil olunur. Türkiyənin tarixi, müasir həyatı, inkişafı bu məkanda geniş təbliğ olunur.

Xalq artisti Azərin də Malazgirt Zəfərinin 951-ci ildönümü münasibətilə təşkil edilən konsert proqramında çıxış edərək bayrama öz töhfəsini verib. Bundan başqa, “Mehtəran” birlikləri “Mehtər marşı” ifaları ilə mərasimdə böyük coşqu yaradıblar.

Tarixdən məlum olduğu kimi, Malazgirt döyüşləri 1071-ci ilin avqustunda baş verib. Bu savaşda Səlcuq Ordusu ilə Bizans imperiyası üz-üzə gəlib və döyüşdə səlcuqlular rəşadətli qələbə çalıblar. Böyük Səlcuq hökmdarı Alparslan ilə Bizans İmperatoru Romen Diyojen arasında gedən müharibənin avqustun 26-da səlcuqlu igidlərin Zəfəri ilə başa çatması Anadolunun qapılarını əbədi olaraq türklərə açıb. Bu Zəfər sayəsində Səlcuq dövləti ilə Bizans arasında 50 illik müqavilə imzalanıb və beləliklə Şərqi Anadolu torpaqları türklərə verilib. Bəzi mənbələrdə göstərilir ki, bu qələbə münasibətilə Bağdad xəlifəsi Alparslanı təbrik edərək onu “İslamın nuru” adlandırıb.

CANLI YAYIM