Türkiyənin Kahramanmaraş vilayətinin ev sahibliyi edəcəyi Beynəlxalq Ekspo 2023 sərgisində 90 illik yaşı olan kəhrəba təsbeh nümayiş etdiriləcək.

Türkiyə KİV-i xəbər verir ki, kolleksiyaçılar tərəfindən ilkin olaraq təsbeh 50 min dollar dəyərində qiymətləndirilib. Təsbehi qiymətli edən onun tək olması və təbii kəhrəbadan hazırlanmasıdır. İstanbulun məşhur ustalarından Bəylərbəyi Qalip Başsakanın əl işi olan kəhrəba təsbeh günümüzə qədər qırılmadan qorunub.

Təsbehin dünya üzrə tək olması sayəsində onun dəyərinin artdığını vurğulayan kolleksiyaçı Mehmet Dəmir qiymətli əşyanın çox həssaslıqla qorunaraq saxlanıldığını bildirib.

Qeyd edək ki, cəlbedici rəngi və görünüşü, həmçinin onu hazırlayan ustanın imzası ilə kolleksiyaçılar üçün xüsusi olan bu kəhrəba təsbeh Kahramanmaraş Beynəlxalq Ekspo 2023 sərgisində 50 min dollara satışa çıxarılacaq.