Yaponiyanın “Sanco çərpələngləri” Azərbaycan səmasında nümayiş olunacaq

17 İyun, 15:10 Sosial mediada paylaşın:

Azərbaycan ilə Yaponiya arasında diplomatik münasibətlərin qurulmasının 30-cu ildönümü ilə əlaqədar keçirilən tədbirlər çərçivəsində Niiqata prefekturasının “Sanco çərpələngləri” ənənəvi tədbiri iyunun 23-də və 24-də Azərbaycan səmasında nümayiş olunacaq.

Bu barədə “Sanco çərpələngləri” Assosiasiyası üzvlərinin Azərbaycana səfəri çərçivəsində təşkil edilən mətbuat konfransında məlumat verilib.

Qeyd edilib ki, “Sanco altıbucaqlısı” adı ilə tanınan çərpələnglər əvvəllər dəfələrlə xarici ölkələrdə nümayiş etdirilsə də, bu, ilk dəfə Azərbaycanda səma döyüşü şəklində təqdim olunacaq.

Assosiasiyanın sədri Sudo deyib ki, çərpələnglər döyüşü layihəsinin ilk dəfə Azərbaycanda nümayiş olunması onu çox sevindirir: “Bu layihənin ilk dəfə Azərbaycanda təqdim edilməsi bizi çox sevindirir. Biz bütün dünyaya sülh niyyətimizi çatdıraraq, arzuların insanları daha mübariz olmağa və yüksək zirvələr fəth etməyə ruhlandırdığını nümayiş etdirməyə çalışacağıq”.

Bildirilib ki, tədbirdə iştirak etmək üçün Azərbaycana assosiasiyanın 26 yaşından 54 yaşınadək olan 10 üzvü yola düşəcək.

İlk olaraq tədbir iyunun 23-də Lənkəran şəhərində, iyunun 24-də isə Xəzər dənizinin sahilində yerləşən Dənizkənarı bulvarda izləyicilərə təqdim olunacaq. Həmin tədbirlərə 10 mindən çox tamaşaçının toplanacağı gözlənilir.

Qeyd edək ki, altıbucaq formasında olan “Sanco çərpələngləri” bütün dünyada həvəskarlar arasında “Sanjo Rokkoku” (Sanco altıbucaqlısı) adı ilə tanınıb. İlk dəfə 2018-ci ildə Azərbaycanda nümayiş olunan bu çərpələnglər böyük tamaşaçı marağına səbəb olub.

CANLI YAYIM