Daşkənddə “Azərbaycan mətbəxi günü” təşkil edilib

13 İyun, 16:42 Sosial mediada paylaşın:

Özbəkistanın paytaxtı Daşkənddə “Prestige” istirahət və əyləncə mərkəzində “Azərbaycan mətbəxi günü” keçirilib.

Tədbir Daşkənddə fəaliyyət göstərən “Yeməli” Azərbaycan restoranının təşkilatçılığı, Azərbaycan qida istehsalçısı “Azərsun Holdinq” və Özbəkistandakı Heydər Əliyev adına Azərbaycan Mədəniyyət Mərkəzinin dəstəyi ilə reallaşıb.

Tədbirin keçirilməsində məqsəd milli mətbəximizi Özbəkistanda tanıtmaq, təbliğ etmək və onun haqqında obyektiv məlumatların yayılması, bu məlumatların saxtalaşdırılmasının qarşısını almaqdır.

“Azərbaycan mətbəxi günü” tədbirində yerli iş adamları, jurnalistlər, ölkəmizin dostları, azərbaycanlılar iştirak ediblər.

Tədbirdə çıxış edən Daşkənddəki “Yeməli” restoranın direktoru Elgün Əliyev və digər natiqlər Azərbaycan mətbəxinin orijinallığından söhbət açaraq, milli mətbəximizin mədəniyyətimiz və ölkəmizin təbiəti kimi zəngin, rəngarəng və müxtəlifliyi ilə fərqləndiyini qeyd ediblər.

Milli mətbəximizin şah əsəri plov və dolmanın müxtəlif növləri, habelə çığırtma, qutab, milli şirniyyatlarımız - şəkərbura, paxlava, qoğal və s. tədbir iştirakçılarına təqdim edilib, müxtəlif yeməklərin hazırlanması üzrə ustad dərsləri təşkil olunub.

Tədbirdə Özbəkistandakı Heydər Əliyev adına Azərbaycan Mədəniyyət Mərkəzi tərəfindən Azərbaycan mədəniyyətinə, mətbəxinə aid xüsusi guşə hazırlanıb və burada milli musiqi alətlərimiz, suvenirlərimiz, Azərbaycana dair nəşrlər sərgilənib.

Bundan başqa, Azərbaycan qida istehsalçısı “Azərsun Holdinq” şirkəti tərəfindən hazırlanan və milli istehsal olan ərzaq, çaylar və içkilər təqdim edilib.

Müxtəlif masalara yeməklər gətirilərkən hər bir mətbəx nümunəsinin hazırlanması, onun xalqımıza aid olmasına dair məlumat və faktlar iştirakçılara çatdırılıb.

Tədbir çərçivəsində Özbəkistandakı Heydər Əliyev adına Azərbaycan Mədəniyyət Mərkəzinin nəzdindəki Əməkdar artist Kaykep Aliyeva adına “Azərbaycan qızları” rəqs ansamblının üzvləri, habelə musiqiçilər bir-birindən gözəl milli rəqslərimizi və musiqilərimizi ifa ediblər.

CANLI YAYIM