Bakı Zooloji Parkında uşaqlar üçün şənlik təşkil edilib

1 İyun, 14:59 Sosial mediada paylaşın:

İyunun 1-də Bakı Zooloji Parkında Uşaqların Beynəlxalq Müdafiəsi Gününə həsr edilmiş “Gələcək uşaqlara məxsusdur” adlı şənlik təşkil edilib.

Şənliyə 11 nömrəli xüsusi təhsil məktəbindən, 2 saylı internat məktəbindən, 1, 2 və 3 nömrəli uşaq evlərindən ümumilikdə 500-ə yaxın uşaq qoşulub.

Zoparkın müxtəlif məntəqələrində qurulan pavilyonlarda ziyarətçilər oyunlara və yarışlara qatılaraq hədiyyələr qazanıblar. Bununla yanaşı balacalar açıq havada gimnastika və yoqa ilə məşğul olub, üz boyama, köpük şouda iştirak ediblər.

Cizgi film personajların iştirakı şənliyə özgə bir rəng qatıb, qonaqların diqqətini müxtəlif viktorina və maraqlı oyunlara cəlb edib.

Ziyarətçilər öz maraq dairələrinə uyğun seçim edərək xalça sənəti, keramika, təbii parçalardan oyuncaqların hazırlanması, eko çantalatın zoomorf ornamentləri ilə bəzədilməsi, quş yemlərinin hazırlanması kimi müxtəlif ustad dərslərinə qatılıblar.

Eyni zamanda uşaqların maariflənməsi üçün onlara zooparkın lektoriyasında heyvanların həyat tərzini özündə əks etdirən cizgi filmlər, biologiyası haqqında təqdimatlar nümayiş edilib. Daha sonra açıq havada heyvanların xarici quruluşları ilə bağlı geniş məlumat əldə edən balaca ziyarətçilərə heyvanlarla yaxından təmasda olmaq və onlara qayğı göstərmək imkanı verilib.

Musiqi sədaları ilə müşayiət olunan və gün boyu davam edəcək şənlik qonaqlarda xoş əhval ruhiyyə yaradaraq unudulmaz günlərdən birinə çevriləcək.

Qeyd edək ki, 2017-ci ildə əsaslı təmirə bağlanan 4 il davam edən yenidənqurma işlərindən sonra Bakı Zooloji Parkı 2021-ci il oktyabrın 7-də qapılarını yenidən ziyarətçilərin üzünə açıb.

CANLI YAYIM