“Məclisi - fəramuşan” poeziya məclisinin Azərbaycan-Özbəkistan şairlərinin iştirakı ilə növbəti görüşü

18 May, 13:39 Sosial mediada paylaşın:

Özbəkistandakı Heydər Əliyev adına Azərbaycan Mədəniyyət Mərkəzinin (AMM) təşəbbüsü, Azərbaycan Mədəniyyət Nazirliyi, hər iki ölkənin yazıçılar birliyi, Dünya Gənc Türk Yazarlar Birliyi, “Özbəkistan-Azərbaycan” Dostluq Cəmiyyətinin dəstəyi ilə “Məclisi - fəramuşan” poeziya məclisinin Azərbaycan-Özbəkistan şairlərinin iştirakı ilə növbəti görüşü keçirilib.

Onlayn formatda keçirilən poeziya görüşündə çıxış edən AMM-nin direktoru Samir Abbasov 2022-ci ilin Azərbaycanda “Şuşa İli” elan edildiyini və bu münasibətlə Mədəniyyət Mərkəzi tərəfindən ölkədə çoxsaylı tədbirlərin, layihələrin reallaşdığını bildirib. O, iki əsrdən sonra bərpa olunan məclisin keçirilməsinin əhəmiyyəti, onun iki ölkə arasında dostluğun, əməkdaşlığın inkişafına töhfəsi, yeni istedadların üzə çıxarılması və türk dünyası arasında ədəbi əlaqələrin genişlənməsinə dəstək olacağını qeyd edib.

S.Abbasov ötən ay “Məclisi - fəramuşan” poeziya görüşlərinin Ermənistanın işğalından azad olunan Azərbaycan mədəniyyətinin paytaxtı Şuşada keçirildiyini və hər iki ölkənin dövlət nümayəndələri, mədəniyyət, ədəbiyyat xadimlərinin rəsmi açılış tədbirində iştirakını, Azərbaycan Dövlət Televiziyasının “Körpü” verilişinin bütövlükdə Şuşada keçirilən “Məclisi - fəramuşan” poeziya görüşlərinə həsr olunmasını əlamətdar hadisə kimi vurğulayıb.

Direktor “Məclisi - fəramuşan” poeziya görüşləri vasitəsilə iki ölkə arasında ədəbiyyat sahəsində əməkdaşlıq platformasının yaradıldığını, şairlərin öz şeirlərini təqdim etməklə yanaşı, gələcəkdə ədəbiyyatın aktual məsələlərinə dair fikir mübadiləsi aparmaq imkanı əldə edə biləcəklərini vurğulayıb.

S.Abbasov növbəti illərdə məclisə Türk dünyasının digər ölkələrinin ədəbiyyat, yaradıcılıq təşkilatlarının, şairlərinin də cəlb ediləcəyini söyləyib.

Daha sonra hər iki ölkənin şairləri öz şeirlərini təqdim ediblər.

Qeyd edək ki, Azərbaycan tərəfdən məclisin moderatoru Azərbaycan Yazıçılar Birliyinin üzvü, Prezident təqaüdçüsü, şair Fuad Cəfərli, Özbəkistan tərəfindən Özbəkistan Yazıçılar İttifaqının üzvü, şairə Nargiz Asadova olub.

Məclisdə səsləndirilən şeirlər ilin sonunda Azərbaycan Mədəniyyət Nazirliyi və AMM-nin layihəsi əsasında Azərbaycan və özbək dillərində nəşr olunacaq.

CANLI YAYIM