Muzeydə "Tarix yazan şəxsiyyət" adlı açıq dərs təşkil edilib

10 May, 17:29 Sosial mediada paylaşın:

Mayın 10-da Azərbaycan İstiqlal Muzeyində Azərbaycan xalqının ümummilli lideri, dahi şəxsiyyət, dünya şöhrətli siyasi xadim Heydər Əliyevin anadan olmasının 99-cu ildönümünə həsr olunmuş "Tarix yazan şəxsiyyət" adlı açıq dərs keçirilib.

Muzeydən bildirilib ki, açıq dərsdə muzeyin elmi işçiləri müasir Azərbaycan Respublikasının qurucusu, xalqının və dövlətinin müstəqilliyi, inkişafı naminə böyük və əvəzedilməz xidmətləri olan ümummilli lider Heydər Əliyevin həyat və fəaliyyəti haqqında məruzələrlə çıxışlar ediblər.

Bildirilib ki, bu gün müstəqil Azərbaycan dövləti inkişafının ən yüksək zirvəsini məhz ulu öndər Heydər Əliyev və onun ən layiqli davamçısı Prezident İlham Əliyevin zəngin dövlətçilik təcrübəsi və uğurlu siyasəti sayəsində yaşayır.

Müzəffər Ali Baş Komandan İlham Əliyevin rəhbərliyi altında güclü Azərbaycan Ordusu 30 ilə yaxın işğal altında olan torpaqlarımızı azad edərək həm tarixi ədaləti, həm də ərazi bütövlüyümüzü bərpa edib. 44 günlük Vətən müharibəsində qazanılan möhtəşəm zəfər ulu öndər Heydər Əliyevin uğurlu siyasətinin nəticəsidir.

Daha sonra ümummilli lider Heydər Əliyevin unudulmaz çıxışlarından ibarət videoçarx nümayiş olunub.

Sonda qonaqlar Azərbaycan xalqının ümummilli lideri Heydər Əliyevin fəaliyyətini əks etdirən muzeyin ekspozisiyası, eləcə də 44 günlük Vətən müharibəsində Azərbaycanın ərazi bütövlüyü və suverenliyi uğrunda qəhrəmancasına şəhidlik zirvəsinə yüksələn mayor Vüsal Vəliyev, XTQ giziri Rəşad Babayev, XTQ əsgəri Cavid Hüseynov, əsgər Samir Paşayev və Şaiq Paşayevin həyat və fəaliyyətinə məxsus, muzeyin fondlarında qorunub saxlanılan 130-a yaxın müxtəlif şəxsi əşyaların, sənədlərin və fotoşəkillərin nümayiş olunduğu sərgi ilə tanış olublar.

CANLI YAYIM